మహబూబాబాద్ జిల్లాలో నాటుసారాపై ఎక్సైజ్, పోలీసుల దాడులు

15 కేసులు నమోదు.. 9 మంది అరెస్టు 50 లీటర్ల నాటుసారా స్వాధీనం.. 1,050 లీటర్ల బెల్లం పానకం ధ్వంసం

మహబూబాబాద్: జిల్లాలో నాటుసారా తయారీ, విక్రయాల నియంత్రణే లక్ష్యంగా ఎక్సైజ్, పోలీసు శాఖల అధికారులు సంయుక్తంగా విస్తృత తనిఖీలు నిర్వహించారు. రెండు ప్రత్యేక బృందాలుగా ఏర్పడిన అధికారులు శుక్రవారం జిల్లాలోని పలు ప్రాంతాల్లో దాడులు చేపట్టారు. ఈ తనిఖీల్లో నాటుసారా తయారీ, విక్రయాలకు సంబంధించి మొత్తం 15 కేసులు నమోదు చేసి, 9 మందిని అరెస్టు చేశారు. దాడుల్లో 50 లీటర్ల నాటుసారాను స్వాధీనం చేసుకోగా, నాటుసారా తయారీకి వినియోగించే 1,050 లీటర్ల బెల్లం పానకాన్ని ధ్వంసం చేశారు. అదేవిధంగా ఐదు కిలోల పటికను స్వాధీనం చేసుకుని, అక్రమ కార్యకలాపాలకు ఉపయోగించిన రెండు వాహనాలను సీజ్ చేశారు. జిల్లాలో నాటుసారా తయారీ, విక్రయాలపై నిఘా కొనసాగిస్తూ అక్రమ కార్యకలాపాల నియంత్రణకు చర్యలు తీసుకుంటున్నట్లు మహబూబాబాద్ ప్రొహిబిషన్ అండ్ ఎక్సైజ్ ఇన్‌స్పెక్టర్ బి. రాంప్రసాద్ పత్రికా ప్రకటనలో వెల్లడించారు.