తిరువూరులో సత్యసాయి సేవా సమితి ఆధ్వర్యంలో అన్నదానం

నిరుపేదలు, వికలాంగులు, భక్తులకు ఆహార పొట్లాల పంపిణీ

తిరువూరు (ఎన్టీఆర్ జిల్లా): ఆకలితో ఉన్నవారికి ఆహారం అందించడమే నిజమైన మానవసేవ అనే స్ఫూర్తితో తిరువూరులో సత్యసాయి సేవా సమితి ఆధ్వర్యంలో ఆదివారం అన్నదాన కార్యక్రమం నిర్వహించారు. ఈ సందర్భంగా నిరుపేదలు, వికలాంగులు, భక్తులకు ఆహార పొట్లాలను పంపిణీ చేశారు. ముందుగా భగవాన్ శ్రీ సత్యసాయి బాబా చిత్రపటానికి ప్రత్యేక పూజలు నిర్వహించి, ఆహార పదార్థాలను స్వామివారికి నైవేద్యంగా సమర్పించారు. అనంతరం హారతి ఇచ్చి అన్నదాన కార్యక్రమాన్ని ప్రారంభించారు.

ఈ సందర్భంగా తిరువూరు సత్యసాయి సేవా సమితి కన్వీనర్ దామెర ప్రభాకర్ రావు మాట్లాడుతూ, అన్ని దానాల్లో అన్నదానం అత్యంత గొప్పదని పేర్కొన్నారు. ఆకలితో ఉన్నవారికి ప్రేమతో ఆహారం అందించడం పరమాత్మునికి నైవేద్యం సమర్పించినట్లేనని అన్నారు. ఆహారం అందించడం ద్వారా ఆకలిని తీర్చడమే కాకుండా, బాధల్లో ఉన్నవారికి ఆత్మీయతను పంచవచ్చని తెలిపారు.

వయోవృద్ధులు, అభాగ్యులు, వికలాంగులు, నిస్సహాయులు, నిరుపేదలకు సేవ చేయడం ప్రతి ఒక్కరి బాధ్యతగా భావించాలని ఆయన పేర్కొన్నారు. నారాయణ సేవలో భాగంగా భక్తులు స్వచ్ఛందంగా ముందుకు వచ్చి ఆహార పొట్లాల పంపిణీలో పాల్గొంటున్నారని తెలిపారు. సేవా కార్యక్రమాల ద్వారా భగవాన్ శ్రీ సత్యసాయి బాబా బోధించిన ప్రేమ, సేవ, మానవత్వం వంటి విలువలను ఆచరణలో పెంపొందించుకోవచ్చని పేర్కొన్నారు.