హైదరాబాద్లో దొంగ డాక్టర్లు ఉన్నారు తస్మాత్ జాగ్రత్త

అనుమతులు లేకుండా వైద్యం చేస్తున్నారనే ఆరోపణలపై నలుగురు అదుపులోకి

మల్కాజిగిరి: అవసరమైన వైద్య అర్హతలు, అనుమతులు లేకుండానే డాక్టర్లుగా ప్రాక్టీస్ చేస్తున్నారనే ఆరోపణలపై నలుగురిని మల్కాజిగిరి ఎస్‌వోటీ పోలీసులు అదుపులోకి తీసుకున్నారు.

పోలీసుల వివరాల ప్రకారం.. కీసర, జవహర్‌నగర్, గోపాలపురం, మార్కెట్ పోలీస్ స్టేషన్ పరిధుల్లో కొందరు వ్యక్తులు ఫస్ట్ ఎయిడ్ సెంటర్లు, క్లినిక్‌లు నిర్వహిస్తున్నట్లు గుర్తించారు. ఆయా కేంద్రాల్లో తనిఖీలు నిర్వహించిన పోలీసులు వైద్య పరికరాలు, మందులు, ఇతర సామగ్రిని స్వాధీనం చేసుకున్నారు.

వైద్య సేవలు అందించేందుకు అవసరమైన అర్హతలు, అనుమతులు ఉన్నాయా అనే అంశంపై పోలీసులు విచారణ చేపట్టారు. నలుగురిని అదుపులోకి తీసుకుని తదుపరి చట్టపరమైన చర్యలు చేపడుతున్నట్లు మల్కాజిగిరి పోలీసులు వెల్లడించారు.

స్వాధీనం చేసుకున్న వైద్య పరికరాలు, మందులకు సంబంధించిన వివరాలను కూడా అధికారులు పరిశీలిస్తున్నట్లు తెలిపారు.