తెలంగాణలో మరో 22 పబ్లిక్ స్కూళ్ల ఏర్పాటుకు ప్రభుత్వం అనుమతులు

రూ.220.70 కోట్లతో మోడల్ విద్యాసంస్థలుగా అభివృద్ధి

తెలంగాణలో ప్రభుత్వ విద్యా వ్యవస్థను మరింత బలోపేతం చేసే దిశగా రాష్ట్ర ప్రభుత్వం కీలక నిర్ణయం తీసుకుంది. రాష్ట్రంలో మరో 22 తెలంగాణ పబ్లిక్ స్కూల్స్ (టీజీపీఎస్) ఏర్పాటుకు అనుమతులు మంజూరు చేసింది.

ఈ పాఠశాలలను ఆధునిక సౌకర్యాలతో కూడిన మోడల్ విద్యాసంస్థలుగా తీర్చిదిద్దేందుకు ప్రభుత్వం రూ.220.70 కోట్ల నిధులను కేటాయించింది. ఈ మేరకు విద్యాశాఖ కార్యదర్శి యోగితారాణా జీవో నంబర్లు 187, 188లను విడుదల చేశారు.

ప్రీ-ప్రైమరీ నుంచి 12వ తరగతి వరకు విద్యార్థులకు ఒకే ప్రాంగణంలో నాణ్యమైన విద్య, మెరుగైన మౌలిక వసతులు అందించడమే లక్ష్యంగా ఈ పబ్లిక్ స్కూళ్లను ఏర్పాటు చేయనున్నారు. తరగతి గదులు, ప్రయోగశాలలు, ఇతర అవసరమైన సౌకర్యాలతో ఈ పాఠశాలలను అభివృద్ధి చేయాలని ప్రభుత్వం నిర్ణయించింది.