మూడు విడతల్లో గ్రామ పంచాయతీ ఎన్నికలు..

13,354 పంచాయతీలకు ఎన్నికల షెడ్యూల్ ఖరారు

అమరావతి: ఆంధ్రప్రదేశ్‌లో గ్రామ పంచాయతీ ఎన్నికల నిర్వహణకు రాష్ట్ర ఎన్నికల సంఘం మూడు విడతల్లో షెడ్యూల్ ప్రకటించింది. రాష్ట్రవ్యాప్తంగా మొత్తం 13,354 గ్రామ పంచాయతీలకు మూడు విడతల్లో ఎన్నికలు నిర్వహించనున్నారు. ఈ నెల 13న తొలి విడత ఎన్నికల నోటిఫికేషన్ విడుదల కానుండగా, 26న పోలింగ్ నిర్వహించి అదే రోజు ఫలితాలు ప్రకటించనున్నారు. రెండో విడత ఎన్నికల నోటిఫికేషన్ ఈ నెల 16న విడుదల కానుంది. ఈ విడతకు సంబంధించిన పోలింగ్ ఈ నెల 29న జరగనుంది. ఇక మూడో విడత ఎన్నికల నోటిఫికేషన్ ఈ నెల 19న విడుదల చేసి, డిసెంబర్ 2న పోలింగ్ నిర్వహించనున్నారు. పోలింగ్ ముగిసిన అనంతరం ఫలితాలు ప్రకటించనున్నారు. నామినేషన్ల దాఖలుకు సంబంధించి తొలి విడతకు ఈ నెల 17 చివరి తేదీగా నిర్ణయించారు. రెండో విడత నామినేషన్లకు ఈ నెల 20 చివరి గడువు కాగా, మూడో విడత నామినేషన్ల దాఖలుకు ఈ నెల 23 చివరి తేదీగా ప్రకటించారు. మూడు విడతల ఎన్నికలతో గ్రామ పంచాయతీల్లో రాజకీయ సందడి నెలకొననుండగా, ఎన్నికల బరిలో నిలిచేందుకు ఆశావహులు సిద్ధమవుతున్నారు.