అంబేద్కర్ కోనసీమ జిల్లాలో పాఠశాలలకు సెలవు

అమలాపురం, సెప్టెంబర్ 24: బంగాళాఖాతంలో ఏర్పడిన తీవ్ర వాతావరణ పరిస్థితుల ప్రభావంతో అంబేద్కర్ కోనసీమ జిల్లా వ్యాప్తంగా భారీ వర్షాలు కురుస్తున్న నేపథ్యంలో విద్యార్థుల భద్రతను దృష్టిలో ఉంచుకుని పాఠశాలలకు సెలవు ప్రకటించారు. జిల్లా కలెక్టర్ ఆదేశాల మేరకు అన్ని యాజమాన్యాల పరిధిలోని పాఠశాలలకు కాంపెన్సేటరీ సెలవు ప్రకటించినట్లు జిల్లా విద్యాశాఖ అధికారి మహబూబ్ బాషా తెలిపారు.

వాతావరణ పరిస్థితుల దృష్ట్యా విద్యార్థులు, ఉపాధ్యాయులకు ఇబ్బందులు కలగకుండా ముందస్తు జాగ్రత్తగా ఈ నిర్ణయం తీసుకున్నట్లు అధికారులు తెలిపారు.

జిల్లాలోని ఉప విద్యాశాఖ అధికారులు, మండల విద్యాశాఖ అధికారులు, అన్ని యాజమాన్యాల పాఠశాలల ప్రధానోపాధ్యాయులు సెలవుకు సంబంధించిన ఆదేశాలను తప్పనిసరిగా పాటించాలని డీఈవో సూచించారు.

విద్యార్థులు, తల్లిదండ్రులు వాతావరణ పరిస్థితులను దృష్టిలో ఉంచుకుని అప్రమత్తంగా ఉండాలని, తదుపరి విద్యాశాఖ లేదా జిల్లా యంత్రాంగం నుంచి వచ్చే అధికారిక సమాచారాన్ని అనుసరించాలని అధికారులు సూచించారు.