విధి నిర్వహణలో మానవత్వం.. పసిబిడ్డకు అండగా నిలిచిన మహిళా కానిస్టేబుల్

విచారణకు వచ్చిన బాధితురాలి ఇబ్బందిని గుర్తించి చిన్నారిని చేతుల్లోకి తీసుకున్న దీప.. పోలీసు సిబ్బంది, న్యాయవాదుల అభినందనలు

ఎల్బీనగర్, నవంబర్ 3 (ఎన్ టుడే న్యూస్):

పోలీసు విధుల్లో బాధ్యతతో పాటు మానవీయతను చాటుకున్నారు మల్కాజిగిరి పోలీస్ కమిషనరేట్ పరిధిలోని చైతన్యపురి పోలీస్ స్టేషన్ మహిళా కోర్టు కానిస్టేబుల్ దీప. విధి నిర్వహణలో భాగంగా ఆమె చూపిన మాతృత్వం, మానవత్వం పలువురి ప్రశంసలు అందుకుంది.

బాధితురాలికి అండగా నిలిచిన దీప

ఎల్‌బీనగర్ స్పెషల్ పోక్సో కోర్టులో విచారణకు చంటి బిడ్డతో హాజరైన ఓ బాధితురాలు ఇబ్బంది పడుతున్న విషయాన్ని కానిస్టేబుల్ దీప గమనించారు. విచారణ సజావుగా కొనసాగేందుకు ఆ పసికందును తన చేతుల్లోకి తీసుకుని తల్లిలా ఆలనాపాలనా చూశారు.

మానవీయతకు అభినందనలు

విధి నిర్వహణలో భాగంగా బాధ్యతలను నిర్వర్తిస్తూనే చిన్నారిని ప్రేమగా చూసుకున్న దీప తీరుపై న్యాయవాదులు, పోలీసు సిబ్బంది అభినందనలు తెలిపారు. పోలీసు వృత్తిలో క్రమశిక్షణతో పాటు మానవత్వం కూడా ఎంత ముఖ్యమో ఆమె తన చర్యతో చాటిచెప్పారు.