యడవల్లి–యర్రావారిగూడెం బీటీ రోడ్డుకు వెంటనే మంజూరు

చింతలపూడి ఎమ్మెల్యే సొంగ రోషన్ కుమార్‌కు వినతిపత్రం అందజేసిన టీడీపీ సీనియర్ యువ నాయకుడు నాయుడు మహేష్

ఏలూరు జిల్లా లింగపాలెం మండలం యడవల్లి గ్రామం నుంచి యర్రావారిగూడెం వరకు బీటీ రోడ్డు నిర్మాణాన్ని వెంటనే మంజూరు చేసి పనులు ప్రారంభించాలని కోరుతూ యడవల్లి టీడీపీ సీనియర్ యువ నాయకుడు నాయుడు మహేష్ చింతలపూడి ఎమ్మెల్యే సొంగ రోషన్ కుమార్‌ను కలిసి వినతిపత్రం అందజేశారు. యడవల్లి–యర్రావారిగూడెం మధ్య రహదారి అధ్వానంగా మారడంతో ఈ మార్గంలో రాకపోకలు సాగించే ప్రజలు, వాహనదారులు తీవ్ర ఇబ్బందులు ఎదుర్కొంటున్నారని ఎమ్మెల్యే దృష్టికి తీసుకెళ్లారు. ముఖ్యంగా వర్షాకాలంలో రహదారి పరిస్థితి మరింత దారుణంగా మారి ప్రయాణానికి ఇబ్బందులు ఏర్పడుతున్నాయని వివరించారు. ప్రజల ఇబ్బందులను దృష్టిలో ఉంచుకుని యడవల్లి నుంచి యర్రావారిగూడెం వరకు బీటీ రోడ్డును త్వరితగతిన మంజూరు చేయించి, సంబంధిత అధికారులతో మాట్లాడి నిర్మాణ పనులు వెంటనే ప్రారంభించేలా చర్యలు తీసుకోవాలని నాయుడు మహేష్ కోరారు. దీనిపై ఎమ్మెల్యే సొంగ రోషన్ కుమార్ సానుకూలంగా స్పందించి, సంబంధిత అధికారులతో మాట్లాడి రహదారి అభివృద్ధికి అవసరమైన చర్యలు తీసుకుంటామని హామీ ఇచ్చినట్లు నాయుడు మహేష్ తెలిపారు. కార్యక్రమంలో నాయుడు మహేష్, పలగాని శ్రీనివాసరావు, కాగితాలా చెన్నారావు, ఈడ నాగరాజు, బొల్లికొండ నాగరాజు, ఈడా వీరాస్వామి తదితర టీడీపీ నాయకులు, గ్రామస్తులు పాల్గొన్నారు.