మూసీ రిజర్వాయర్కు కొనసాగుతున్న వరద ప్రవాహం
గేట్లు తెరిచి దిగువకు నీటిని విడుదల చేసే అవకాశం.. పరివాహక ప్రాంతాల ప్రజలకు అప్రమత్తత సూచన
తెలంగాణ, ఎన్ టుడే న్యూస్: ఎగువ పరివాహక ప్రాంతాల్లో కురుస్తున్న భారీ వర్షాల కారణంగా మూసీ రిజర్వాయర్కు వరద ప్రవాహం కొనసాగుతోంది. రిజర్వాయర్ పూర్తిస్థాయి నీటిమట్టం 645 అడుగులు కాగా.. ప్రస్తుతం 640.58 అడుగులకు నీటిమట్టం చేరినట్లు అధికారులు తెలిపారు.
గత 24 గంటల్లో సుమారు 1,150 క్యూసెక్కుల వరద నీరు రిజర్వాయర్లోకి చేరినట్లు నీటిపారుదల శాఖ అధికారులు వెల్లడించారు. ఎగువ ప్రాంతాల్లో వర్షాలు కొనసాగుతున్న నేపథ్యంలో రానున్న గంటల్లో వరద ప్రవాహం మరింత పెరిగే అవకాశం ఉందని అధికారులు అంచనా వేస్తున్నారు.
వరద పరిస్థితులను ఎప్పటికప్పుడు పర్యవేక్షిస్తున్నామని నీటిపారుదల శాఖ ఈఈ డి. యాదగిరి తెలిపారు. పరిస్థితులను బట్టి ముందస్తు జాగ్రత్త చర్యల్లో భాగంగా రిజర్వాయర్ గేట్లను తెరిచి దిగువ ప్రాంతాలకు నీటిని విడుదల చేసే అవకాశం ఉందని పేర్కొన్నారు.
ఈ నేపథ్యంలో మూసీ పరివాహక ప్రాంతాల ప్రజలు అప్రమత్తంగా ఉండాలని అధికారులు సూచించారు. నది పరిసరాల్లోకి వెళ్లవద్దని, ముఖ్యంగా రాత్రి వేళల్లో మూసీ నది సమీప ప్రాంతాలకు వెళ్లకుండా జాగ్రత్తలు తీసుకోవాలని సూచించారు.
వరద ప్రవాహం, రిజర్వాయర్ నీటిమట్టంలో మార్పులను ప్రజలు గమనిస్తూ అధికారుల సూచనలను పాటించాలని అధికారులు కోరారు.
