తుఫాను ప్రభావంతో దెబ్బతిన్న పంటల పరిశీలన

జియ్యమ్మవలస, సెప్టెంబర్ 25: పార్వతీపురం మన్యం జిల్లా కురుపాం నియోజకవర్గం జియ్యమ్మవలస మండలంలోని చింతలబెలగాం, దత్తివలస గ్రామాల్లో తుఫాను ప్రభావంతో కురిసిన భారీ వర్షాలు, ఈదురుగాలులకు దెబ్బతిన్న పంటలను అరకు పార్లమెంట్ అబ్జర్వర్ కమిటీ మెంబర్, లోకల్ బాడీ ఎలక్షన్ కమిటీ మెంబర్ ఎల్. రంజిత్ కుమార్ క్షేత్రస్థాయిలో పరిశీలించారు.

భారీ వర్షాలు, ఈదురుగాలుల కారణంగా నేలమట్టమైన అరటి, మొక్కజొన్న, పామ్ ఆయిల్ తదితర పంటలను ఆయన పరిశీలించారు. పంటలు నష్టపోయిన రైతులతో నేరుగా మాట్లాడి, జరిగిన నష్టం వివరాలను అడిగి తెలుసుకున్నారు.

ఈ సందర్భంగా రైతులు తమ పంటలకు జరిగిన నష్టాన్ని రంజిత్ కుమార్‌కు వివరించారు. పంట నష్టంపై సంబంధిత అధికారులకు సమాచారం అందించి, నష్టాన్ని అంచనా వేయించేలా చర్యలు తీసుకోవాలని రైతులు కోరారు.

రైతులకు తగిన నష్టపరిహారం అందేలా ప్రభుత్వ విప్, ఎమ్మెల్యే తోయక జగదీశ్వరి, వ్యవసాయ శాఖ మంత్రి కింజరాపు అచ్చెన్నాయుడు దృష్టికి సమస్యను తీసుకెళ్తామని రంజిత్ కుమార్ తెలిపారు. అలాగే సంబంధిత అధికారుల దృష్టికి కూడా పంట నష్టాన్ని తీసుకెళ్లి, నష్టాన్ని అంచనా వేయించి రైతులకు న్యాయం జరిగేలా కృషి చేస్తామని హామీ ఇచ్చారు.

ప్రకృతి వైపరీత్యాల కారణంగా పంటలు నష్టపోయిన రైతులకు ప్రభుత్వం అండగా ఉంటుందని, తుఫాను ప్రభావంతో నష్టపోయిన రైతులకు తగిన సహాయం అందేలా చర్యలు తీసుకుంటామని రైతులకు తెలిపారు.

ఈ కార్యక్రమంలో జనసేన నాయకులు సత్యనారాయణ, నవీన్, వైకుంఠ, సుధా తదితరులు పాల్గొని పంట నష్టాన్ని పరిశీలించారు.