ఏపీలో పల్లెపోరుకు ముహూర్తం ఖరారు.. నవంబర్ 13న ఎన్నికల షెడ్యూల్ విడుదల

అమరావతి: ఆంధ్రప్రదేశ్‌లో గ్రామ పంచాయతీ ఎన్నికలకు రంగం సిద్ధమవుతోంది. పల్లెపోరుకు సంబంధించి రాష్ట్ర ఎన్నికల సంఘం కసరత్తు ముమ్మరం చేసింది. ఈ నెల 13వ తేదీన పంచాయతీ ఎన్నికల షెడ్యూల్‌ను విడుదల చేయనున్నట్లు సమాచారం. రాష్ట్రవ్యాప్తంగా మూడు దశల్లో ఎన్నికలు నిర్వహించేందుకు కార్యాచరణ రూపొందించింది. రాష్ట్రంలోని మొత్తం 13,219 గ్రామ పంచాయతీలకు ఎన్నికలు నిర్వహించేందుకు ఎన్నికల సంఘం ఏర్పాట్లు చేస్తోంది. నవంబర్ 26, 29 తేదీలతో పాటు డిసెంబర్ 2వ తేదీన మూడు విడతల్లో పోలింగ్ నిర్వహించనున్నారు. ఇందుకు సంబంధించి తొలి విడత ఎన్నికల నోటిఫికేషన్‌ను నవంబర్ 13న, రెండో విడత నోటిఫికేషన్‌ను నవంబర్ 16న, మూడో విడత నోటిఫికేషన్‌ను నవంబర్ 19న విడుదల చేయనున్నట్లు ఎన్నికల సంఘం ప్రకటించింది. ఎన్నికల షెడ్యూల్ విడుదలతో గ్రామీణ ప్రాంతాల్లో రాజకీయ సందడి మొదలుకానుంది. గ్రామాల్లో సర్పంచ్, వార్డు సభ్యుల స్థానాల కోసం ఆశావహులు ఇప్పటి నుంచే ప్రయత్నాలు ముమ్మరం చేస్తున్నారు. అధికారిక షెడ్యూల్ విడుదలైన తర్వాత ఎన్నికల ప్రక్రియ మరింత వేగం పుంజుకోనుంది.