కంభంపాడులో షార్ట్ సర్క్యూట్‌తో భారీ అగ్నిప్రమాదం..

పూర్తిగా దగ్ధమైన ఇల్లు మేకల ఇస్సాకు కుటుంబానికి తీరని ఆస్తి నష్టం ఎన్టీఆర్ జిల్లా, ఏ.కొండూరు, నవంబర్ 9: ఏ.కొండూరు మండలం కంభంపాడు గ్రామంలోని మాలపల్లిలో విద్యుత్ షార్ట్ సర్క్యూట్ కారణంగా భారీ అగ్నిప్రమాదం చోటుచేసుకుంది. ఈ ప్రమాదంలో మేకల ఇస్సాకు అనే వ్యక్తికి చెందిన ఇల్లు పూర్తిగా దగ్ధమైంది. ఒక్కసారిగా చెలరేగిన మంటలు క్షణాల్లో ఇల్లంతా వ్యాపించడంతో ఇంట్లోని సామగ్రి మొత్తం అగ్నికి ఆహుతైనట్లు సమాచారం. కష్టపడి నిర్మించుకున్న ఇల్లు కళ్లముందే మంటల్లో కాలిపోవడంతో బాధిత కుటుంబం తీవ్ర విషాదంలో మునిగిపోయింది. ఇంట్లోని విలువైన వస్తువులు, నిత్యావసర సామగ్రి పూర్తిగా దగ్ధం కావడంతో కుటుంబానికి భారీ ఆస్తి నష్టం వాటిల్లింది. ఒక్క ప్రమాదంతో నిలువ నీడ కోల్పోయిన బాధితుల పరిస్థితి దయనీయంగా మారింది. ఈ ఘటనతో గ్రామంలో ఆందోళన నెలకొంది. సంబంధిత అధికారులు వెంటనే స్పందించి అగ్నిప్రమాదానికి గల కారణాలను పరిశీలించాలని, బాధిత కుటుంబానికి జరిగిన ఆస్తి నష్టాన్ని అంచనా వేసి ప్రభుత్వ పరంగా తగిన పరిహారం అందించాలని గ్రామస్తులు కోరుతున్నారు. ఇల్లు కోల్పోయి ఇబ్బందుల్లో ఉన్న కుటుంబానికి ప్రభుత్వం తక్షణ సహాయం అందించి ఆదుకోవాలని స్థానికులు విజ్ఞప్తి చేస్తున్నారు.