విజయవాడ ఉత్సవ్‌కు ప్రధాని మోదీ, అమిత్ షాకు ఆహ్వానం
ముఖ్యమంత్రి చంద్రబాబు నేతృత్వంలో ఆహ్వానం
విజయవాడ: విజయవాడ ఉత్సవ్–2026కు హాజరు కావాల్సిందిగా ప్రధానమంత్రి నరేంద్ర మోదీ, కేంద్ర హోంమంత్రి అమిత్ షాలను ఆహ్వానించారు. ముఖ్యమంత్రి నారా చంద్రబాబు నాయుడుతో పాటు నరసరావుపేట ఎంపీ, తెలుగుదేశం పార్లమెంటరీ పార్టీ నేత లావు శ్రీకృష్ణదేవరాయలు, సనా సతీష్ తదితరులు ఈ ఆహ్వాన కార్యక్రమాల్లో పాల్గొన్నారు.
ముందుగా ప్రధానమంత్రి నరేంద్ర మోదీని కలిసి విజయవాడ ఉత్సవ్‌కు ఆహ్వానించిన నాయకులు, అనంతరం కేంద్ర హోంమంత్రి అమిత్ షాను కూడా కలిసి ఉత్సవానికి హాజరు కావాలని కోరారు.
విజయవాడ నగర సాంస్కృతిక వైభవం, సంప్రదాయాలు, ఆధ్యాత్మిక ప్రాధాన్యం, ప్రజల జీవనశైలిని ప్రతిబింబించేలా విజయవాడ ఉత్సవ్‌ను నిర్వహించేందుకు ఏర్పాట్లు చేస్తున్నట్లు నిర్వాహకులు పేర్కొన్నారు. దసరా శరన్నవరాత్రి ఉత్సవాలు, సరస్ మేళాతో పాటు విజయవాడ ఉత్సవ్–2.0 నగరంలో ప్రత్యేక కార్యక్రమంగా నిర్వహించేందుకు ప్రణాళికలు రూపొందిస్తున్నారు. ఇందులో భాగంగా జాతీయ స్థాయి ప్రముఖులను ఉత్సవానికి ఆహ్వానిస్తున్నారు.
ప్రధాని నరేంద్ర మోదీ, కేంద్ర హోంమంత్రి అమిత్ షా ఉత్సవానికి హాజరవుతారా లేదా అనే విషయంపై అధికారిక ప్రకటన వెలువడాల్సి ఉంది. వారు పాల్గొంటే విజయవాడ ఉత్సవ్‌కు జాతీయ స్థాయిలో మరింత గుర్తింపు లభించే అవకాశం ఉంది.
