కాలువలోకి దూసుకెళ్లిన స్కూల్ వ్యాన్.. తృటిలో తప్పిన భారీ ప్రమాదం

ఖమ్మం జిల్లా మధిరకు చెందిన శ్రీనిధి స్కూల్ వ్యాన్ మంగళవారం సిరిపురం–వంగవీడు రోడ్డులో అదుపుతప్పి రహదారి పక్కనే ఉన్న కాలువలోకి దూసుకెళ్లింది. విద్యార్థులను పాఠశాలకు తీసుకెళ్తున్న సమయంలో ఈ ఘటన చోటుచేసుకుంది.

ప్రమాదాన్ని గమనించిన స్థానికులు, ప్రయాణికులు వెంటనే స్పందించి వ్యాన్‌లో ఉన్న విద్యార్థులను సురక్షితంగా బయటకు తీసుకొచ్చారు. ఈ ఘటనలో కొందరు విద్యార్థులకు స్వల్ప గాయాలు అయినట్లు సమాచారం. భారీ ప్రమాదం తృటిలో తప్పడంతో విద్యార్థుల తల్లిదండ్రులు ఊపిరిపీల్చుకున్నారు.

సమాచారం అందుకున్న పోలీసులు ఘటనాస్థలికి చేరుకుని పరిశీలించారు. ప్రమాదానికి గల కారణాలపై విచారణ చేపట్టారు. ఘటనకు సంబంధించిన పూర్తి వివరాలు తెలియాల్సి ఉంది.