విదేశీయుల వీసా నిబంధనల్లో కీలక మార్పులు.. దరఖాస్తు ప్రక్రియ సరళీకృతం

న్యూఢిల్లీ: విదేశీయులకు వీసా జారీ ప్రక్రియను మరింత సులభతరం చేసేందుకు కేంద్ర ప్రభుత్వం కీలక మార్పులు చేపట్టింది. ఇందులో భాగంగా ప్రధాన వీసా విభాగాల సంఖ్యను 13 నుంచి 9కి తగ్గించగా, ఉప విభాగాలను 49 నుంచి 23కు కుదించింది. అలాగే వీసా దరఖాస్తు పత్రాల్లో అవసరమైన వివరాల సంఖ్యను 65 నుంచి 70 శాతం వరకు తగ్గించింది. దరఖాస్తుదారులపై అనవసర పత్రాల భారం తగ్గించి, వీసా ప్రక్రియను వేగవంతం చేయడమే ఈ మార్పుల ప్రధాన ఉద్దేశమని కేంద్రం పేర్కొంది. కొత్త విధానంలో పర్యాటకులు, విద్యార్థులు, వ్యాపారవేత్తలు, వైద్య చికిత్స కోసం భారత్‌కు వచ్చే విదేశీయులకు మరింత సౌకర్యవంతమైన సేవలు అందనున్నాయి. ఒకే తరహా ప్రయాణ అవసరాలకు ఒకే వీసా విభాగాన్ని వర్తింపజేయడం ద్వారా దరఖాస్తుదారులు తమకు అవసరమైన వీసాను సులభంగా ఎంపిక చేసుకునే అవకాశం కల్పించారు. ఈ మార్పులతో వీసా దరఖాస్తు ప్రక్రియలో జాప్యం తగ్గి, విదేశీయులకు మెరుగైన సేవలు అందుతాయని కేంద్ర ప్రభుత్వం భావిస్తోంది.