భారత్‌లో బ్యాటరీ వ్యర్థాల ఎగుమతులపై కేంద్రం నిషేధం

దేశీయంగా కీలక ఖనిజాల లభ్యతను పెంచడంతో పాటు విద్యుత్ వాహనాల బ్యాటరీ తయారీ రంగాన్ని బలోపేతం చేసే దిశగా కేంద్ర ప్రభుత్వం కీలక నిర్ణయం తీసుకుంది. ఇందులో భాగంగా లిథియం అయాన్ బ్యాటరీల నుంచి లభించే బ్లాక్ మాస్, బ్యాటరీల తుక్కు ఎగుమతులపై నిషేధం విధించింది. లిథియం, కోబాల్ట్, నికెల్ వంటి విలువైన ఖనిజాలను విదేశాలకు తరలించకుండా దేశంలోనే తిరిగి వినియోగంలోకి తీసుకురావాలని కేంద్రం నిర్ణయించింది. బ్యాటరీ వ్యర్థాలను దేశీయంగా రీసైకిల్ చేయడం ద్వారా ఈ ఖనిజాలను తిరిగి వెలికితీసి పరిశ్రమలకు అందుబాటులోకి తీసుకురావాలని లక్ష్యంగా పెట్టుకుంది. ఈ నిర్ణయంతో దేశీయ విద్యుత్ వాహనాల బ్యాటరీ తయారీకి అవసరమైన ముడి పదార్థాల సరఫరా వ్యవస్థ బలోపేతం కావడంతో పాటు దిగుమతులపై ఆధారపడటాన్ని తగ్గించే అవకాశం ఉందని భావిస్తున్నారు.