ప్రశ్నించే జర్నలిస్టుకు భారత వీసా రద్దు..

నార్వే విమానాశ్రయంలో హెల్లె లింగ్‌కు అడ్డంకులు 

ప్రధాని నరేంద్ర మోదీని గతంలో ప్రశ్నించిన నార్వేకు చెందిన జర్నలిస్ట్ హెల్లె లింగ్ (Helle Lyng)కు భారత్‌లో పర్యటించేందుకు వీసా మంజూరైనప్పటికీ, చివరి నిమిషంలో ప్రయాణానికి అడ్డంకులు ఎదురైనట్లు ఆమె వెల్లడించారు. హైదరాబాద్‌లో కాంగ్రెస్ పార్టీ నిర్వహించనున్న 'భారత్ సమ్మిట్‌'లో ప్రసంగించేందుకు తనకు ఆహ్వానం అందిందని, మీడియా స్వేచ్ఛ, పత్రికా స్వేచ్ఛ అంశాలపై మాట్లాడాల్సి ఉందని ఆమె తెలిపారు. ఇందుకు సంబంధించి అవసరమైన పాస్‌పోర్టు, వీసా పత్రాలు తన వద్ద ఉన్నప్పటికీ నార్వే విమానాశ్రయంలో తనను అడ్డుకున్నారని పేర్కొన్నారు. భారత హోం మంత్రిత్వ శాఖ నుంచి వచ్చిన ఆదేశాల మేరకు తన వీసాను రద్దు చేసినట్లు సమాచారం అందిందని ఆమె సామాజిక మాధ్యమం ద్వారా వెల్లడించారు. ఈ పరిణామంపై రాజకీయంగా చర్చ మొదలైంది. ప్రశ్నించే గొంతుకలను ఎదుర్కోవడంలో ప్రభుత్వ వైఖరిపై విమర్శలు వ్యక్తమవుతున్నాయి. 56 అంగుళాల ఛాతీ అని చెప్పుకునే నాయకత్వం ప్రశ్నలను ఎదుర్కోవడానికి ఎందుకు వెనుకడుగు వేస్తోందన్న విమర్శలు వినిపిస్తున్నాయి.