నంద్యాలలో పాఠశాలలను ఆకస్మికంగా తనిఖీ చేసిన మంత్రి ఫరూక్

నంద్యాల: రాష్ట్రవ్యాప్తంగా ప్రభుత్వ పాఠశాలల్లో విద్యా ప్రమాణాలు, మౌలిక వసతులను క్షేత్రస్థాయిలో పరిశీలించి మరింత బలోపేతం చేసే కార్యక్రమంలో భాగంగా రాష్ట్ర మంత్రి ఎన్.ఎం.డి. ఫరూక్ సోమవారం నంద్యాల పట్టణంలోని పలు పాఠశాలలను ఆకస్మికంగా తనిఖీ చేశారు.

ఈ సందర్భంగా పట్టణంలోని హోలీ క్రాస్ హైస్కూల్, ఖలీల్ సిద్దికి హైస్కూల్, సిద్దికి ఎయిడెడ్ ప్రైమరీ స్కూల్లను మంత్రి సందర్శించారు. ఆయా పాఠశాలల్లో విద్యార్థులకు అందుతున్న విద్యా సౌకర్యాలు, పాఠశాల నిర్వహణ తీరును పరిశీలించారు.

మౌలిక వసతుల పరిశీలన
ఉపాధ్యాయులతో చర్చ
విద్యార్థినికి సన్మానం

పాఠశాలల్లోని తరగతి గదులు, తాగునీటి సదుపాయం, పారిశుధ్యం తదితర మౌలిక వసతులను మంత్రి క్షేత్రస్థాయిలో పరిశీలించారు. విద్యార్థులకు అవసరమైన సౌకర్యాలు అందుతున్నాయా లేదా అనే అంశాలపై వివరాలు తెలుసుకున్నారు.

అనంతరం ప్రధానోపాధ్యాయులు, ఉపాధ్యాయులతో మంత్రి ఫరూక్ మాట్లాడారు. పాఠశాలల్లో విద్యార్థుల హాజరు శాతం, రోజువారీ బోధనా కార్యక్రమాలు, పాఠశాల నిర్వహణకు సంబంధించిన అంశాలపై ఆరా తీశారు. విద్యార్థుల విద్యా ప్రగతిపై ప్రత్యేక దృష్టి పెట్టాలని సూచించారు.

తనిఖీ సందర్భంగా మంత్రి ఫరూక్ విద్యార్థులతో మాట్లాడి పలు ప్రశ్నలు అడిగారు. ఆయన అడిగిన ప్రశ్నలకు చక్కగా సమాధానాలు ఇచ్చిన 10వ తరగతి విద్యార్థిని లక్ష్మీ ప్రసన్నను మంత్రి అభినందించి సన్మానించారు.

ప్రభుత్వ పాఠశాలల్లో విద్యా ప్రమాణాలను మెరుగుపరచడంతో పాటు విద్యార్థులకు అవసరమైన మౌలిక వసతులు అందుబాటులో ఉండేలా క్షేత్రస్థాయిలో పరిస్థితులను పరిశీలిస్తున్నట్లు మంత్రి తెలిపారు.