పెనుగొలనులో భక్తిశ్రద్ధలతో నగర సంకీర్తన.. హనుమాన్ చాలీసా పారాయణం

గంపలగూడెం నవంబర్ 8: ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలో ఆధ్యాత్మిక సందడి నెలకొంది. లోకకళ్యాణం, సర్వలోక శాంతిని కాంక్షిస్తూ ఆదివారం సత్యసాయి సేవా కమిటీ ఆధ్వర్యంలో నగర సంకీర్తన కార్యక్రమాన్ని భక్తిశ్రద్ధలతో నిర్వహించారు. ముందుగా శివాలయ ప్రాంగణంలోని అయ్యప్ప స్వామి మందిరం వద్ద భజన కార్యక్రమం నిర్వహించారు. అనంతరం అయ్యప్ప స్వామి మందిరం నుంచి రేడియో రూము, వాటర్ ట్యాంక్ రోడ్డు, బస్టాండ్, బొడ్రాయి సెంటర్, రామాలయం మీదుగా నగర సంకీర్తన కొనసాగింది. ఈ సందర్భంగా భక్తులు 'ఓం సాయి, శ్రీ సాయి, జయజయ సాయి', 'శ్రీరామ, జయరామ, జయజయరామ' నామస్మరణతో గ్రామ వీధులను ఆధ్యాత్మిక వాతావరణంతో నింపారు. ఈ కార్యక్రమంలో సత్యసాయి సేవా కమిటీ సభ్యులు డాక్టర్ జి. నరసింహారావు, సుగ్గల హనుమంతరావు, పారేపల్లి కృష్ణారావు తదితరులు పాల్గొన్నారు. పెనుగొలనులో భక్తి పారవశ్యంతో హనుమాన్ చాలీసా పారాయణం పెనుగొలను గ్రామంలోని బొడ్రాయి సెంటర్ వద్ద కొలువుదీరిన అభయాంజనేయ స్వామి ఏకశిలా విగ్రహం వద్ద శనివారం రాత్రి భక్త బృందం ఆధ్వర్యంలో హనుమాన్ చాలీసా పారాయణం, భజన కార్యక్రమాలను భక్తిప్రపత్తులతో నిర్వహించారు. ఈ సందర్భంగా భక్తులు సామూహికంగా హనుమాన్ చాలీసా పారాయణం చేసి స్వామివారిని స్మరించుకున్నారు. అనంతరం అభయాంజనేయ స్వామికి ప్రత్యేక పూజలు నిర్వహించి, వివిధ రకాల ప్రసాదాలను నైవేద్యంగా సమర్పించారు. పూజల అనంతరం భక్తులకు ప్రసాదాలను పంపిణీ చేశారు. ఈ కార్యక్రమానికి సంబంధించిన ఏర్పాట్లను పసుమర్తి లక్ష్మణరావు, రాళ్లచర్ల జగన్నాథం, రంగా శేషగిరి పర్యవేక్షించారు.