విద్యార్థుల భద్రతలో నిర్లక్ష్యాన్ని ఉపేక్షించేది లేదు

స్కూల్ బస్సు డ్రైవర్లకు ప్రతిరోజూ మద్యం పరీక్షలు నిర్వహించాలి: వరంగల్ సీపీ ఎన్. శ్వేత

డ్రంక్ అండ్ డ్రైవ్ తనిఖీల్లో 14 మంది డ్రైవర్లు పట్టివేత.. మద్యం మత్తులో స్కూల్ బస్సు నడిపిన డ్రైవర్‌కు ఐదు రోజుల జైలు శిక్ష

వరంగల్ (ఎన్ టుడే న్యూస్): పాఠశాలలకు వెళ్లే విద్యార్థుల భద్రత విషయంలో ఎలాంటి నిర్లక్ష్యాన్ని ఉపేక్షించేది లేదని వరంగల్ పోలీస్ కమిషనర్ ఎన్. శ్వేత, ఐపీఎస్ స్పష్టం చేశారు. స్కూల్ బస్సులు, వ్యాన్లు నడిపే డ్రైవర్లు, పాఠశాల యాజమాన్యాలు విద్యార్థుల భద్రతకు పూర్తి బాధ్యత వహించాలని సూచించారు. విధి నిర్వహణలో మద్యం సేవించి వాహనాలు నడిపినా, నిర్లక్ష్యంగా డ్రైవింగ్ చేసినా కఠిన చట్టపరమైన చర్యలు తీసుకుంటామని హెచ్చరించారు.

ప్రతిరోజూ డ్రైవర్లకు మద్యం పరీక్షలు తప్పనిసరి

ప్రతి పాఠశాల యాజమాన్యం డ్రంకెన్ డ్రైవ్ పరీక్షల కోసం బ్రీత్ అనలైజర్ పరికరాలను కొనుగోలు చేయాలని సీపీ సూచించారు. ప్రతిరోజూ విధులకు హాజరయ్యే డ్రైవర్లకు ముందుగా మద్యం పరీక్షలు నిర్వహించి, వారు మద్యం సేవించలేదని నిర్ధారించుకున్న తర్వాతే స్కూల్ బస్సులు, వ్యాన్లు నడిపేందుకు అనుమతించాలని స్పష్టం చేశారు.

అదేవిధంగా డ్రైవర్ల విద్యార్హతలు, డ్రైవింగ్ లైసెన్సులు, వాహనాల ఫిట్‌నెస్ తదితర అంశాలను పాఠశాల యాజమాన్యాలు నిరంతరం పర్యవేక్షించాలని సూచించారు. విద్యార్థులను సురక్షితంగా గమ్యస్థానాలకు చేర్చే విషయంలో డ్రైవర్లు అప్రమత్తంగా, బాధ్యతాయుతంగా వ్యవహరించాలని పేర్కొన్నారు.

తనిఖీల్లో 14 మంది డ్రైవర్లు పట్టివేత

వరంగల్ పోలీస్ కమిషనర్ ఆదేశాల మేరకు ట్రాఫిక్ అడిషనల్ డీసీపీ రాయల ప్రభువు ప్రభాకర్ రావు, ట్రాఫిక్ ఏసీపీ టి. సత్యనారాయణ పర్యవేక్షణలో కాజీపేట ట్రాఫిక్ పోలీసులు గురువారం డ్రంక్ అండ్ డ్రైవ్ తనిఖీలు నిర్వహించారు. ఈ తనిఖీల్లో మద్యం సేవించి వాహనాలు నడుపుతున్న 14 మంది డ్రైవర్లు పట్టుబడ్డారు.

వారిలో ఒకరు అధిక మోతాదులో మద్యం సేవించి ప్రైవేట్ పాఠశాలకు చెందిన బస్సును నడుపుతూ పట్టుబడ్డారు. ఈ కేసులో నిందితుడిని కోర్టులో హాజరుపరచగా, ద్వితీయ శ్రేణి న్యాయమూర్తి రాజశేఖర్ రెడ్డి ఐదు రోజుల జైలు శిక్ష విధించారు. దీంతో అతడిని పరకాల సబ్‌జైలుకు తరలించారు. మిగిలిన వారికి జరిమానాలు విధించినట్లు పోలీసులు తెలిపారు.

లైసెన్స్ లేకుండా వాహనాలు నడిపిన ఆరుగురు మైనర్లు

మరోవైపు డ్రైవింగ్ లైసెన్స్ లేకుండా వాహనాలు నడుపుతున్న ఆరుగురు మైనర్లను పోలీసులు గుర్తించి జువైనల్ కోర్టులో హాజరుపరిచారు. ఈ కేసులను విచారించిన న్యాయమూర్తి ఎం.డి. ఫారియా, వారిని ఒకరోజు జువైనల్ హోంకు పంపించాలని ఆదేశించారు.

మైనర్లకు వాహనాలు ఇచ్చే తల్లిదండ్రులు, వాహన యజమానులపై కూడా చట్టప్రకారం చర్యలు తీసుకుంటామని సీపీ హెచ్చరించారు. మద్యం సేవించి వాహనాలు నడిపే వారి డ్రైవింగ్ లైసెన్సుల రద్దుకు కూడా చర్యలు చేపడతామని తెలిపారు.

తల్లిదండ్రులు, పాఠశాల యాజమాన్యాలకు హెచ్చరిక

విద్యార్థుల ప్రాణాల భద్రత ప్రతి ఒక్కరి బాధ్యత అని పోలీస్ కమిషనర్ స్పష్టం చేశారు. స్కూల్ బస్సు డ్రైవర్ల నిర్లక్ష్యం, పాఠశాల యాజమాన్యాల బాధ్యతారాహిత్యాన్ని తీవ్రంగా పరిగణిస్తామని తెలిపారు. మైనర్లకు వాహనాలు నడిపేందుకు ఇచ్చే తల్లిదండ్రులు, వాహన యజమానులు కూడా చట్టపరమైన పరిణామాలను ఎదుర్కోవాల్సి వస్తుందని హెచ్చరించారు.

విద్యార్థుల భద్రతను దృష్టిలో ఉంచుకుని పాఠశాల యాజమాన్యాలు ముందస్తు జాగ్రత్తలు తీసుకోవాలని, డ్రైవర్లు ట్రాఫిక్ నిబంధనలు తప్పనిసరిగా పాటించాలని సీపీ సూచించారు.