డిల్లీ లో జర్నలిస్ట్ ల పై పోలీస్ ల దాడి

జర్నలిస్టుల నిర్బంధంపై సుప్రీంకోర్టును ఆశ్రయించిన మీడియా సంఘం!

ఢిల్లీలో జర్నలిస్టులపై పోలీసుల చర్యలను సవాల్ చేస్తూ పిటిషన్

ఢిల్లీలో నిరసన కార్యక్రమాలను కవర్ చేస్తున్న జర్నలిస్టులను నిర్బంధించడం, భౌతికంగా బలవంతంగా అదుపులోకి తీసుకోవడం, అక్కడి నుంచి బలవంతంగా తరలించడం వంటి చర్యలు రాజ్యాంగ హక్కుల ఉల్లంఘనకు దారితీస్తున్నాయని ఆరోపిస్తూ *నెట్‌వర్క్ ఆఫ్ విమెన్ ఇన్ మీడియా, ఇండియా* (NWMI) సుప్రీంకోర్టును ఆశ్రయించింది. రాజ్యాంగంలోని ఆర్టికల్ 32 కింద పిటిషన్ దాఖలు చేసింది.

జర్నలిస్టులపై పోలీసుల చర్యలు రాజ్యాంగంలోని ఆర్టికల్ 14, 19(1)(a), 19(1)(d), 21లను ఉల్లంఘిస్తున్నాయని పిటిషన్‌లో పేర్కొంది. స్వతంత్రంగా వార్తలు సేకరించే జర్నలిస్టులకు రక్షణ కల్పించాలని కోరింది.

సీనియర్ జర్నలిస్టు పరంజోయ్ గుహా ఠాకుర్తా అక్టోబర్ 10న తన ప్రెస్ ఇన్ఫర్మేషన్ బ్యూరో (PIB) గుర్తింపు కార్డును చూపించినప్పటికీ పోలీసులు తనను అదుపులోకి తీసుకున్నారని పిటిషన్‌లో ప్రస్తావించారు. తన నిర్బంధానికి గల కారణాలు తెలియజేయలేదని, సంబంధిత పత్రాలు కూడా అందించలేదని ఆయన పేర్కొన్నట్లు వివరించారు.

మరోవైపు, ఢిల్లీలో రెండు రోజుల వ్యవధిలో కనీసం 35 మంది జర్నలిస్టులను నిర్బంధించినట్లు *కమిటీ టు ప్రొటెక్ట్ జర్నలిస్ట్స్ (CPJ)* నివేదికను కూడా పిటిషన్‌లో ప్రస్తావించారు.

నిరసనల సమయంలో వార్తా సేకరణ చేసే జర్నలిస్టుల హక్కులను పరిరక్షించేందుకు సుప్రీంకోర్టు జోక్యం చేసుకోవాలని మీడియా సంఘం కోరింది.