గుంతలమయమైన రహదారి.. విద్యార్థుల నిరసన

కొమురం భీమ్ ఆసిఫాబాద్ జిల్లా పెంచికల్‌పేట మండలం లోడ్‌పల్లి వద్ద రహదారి గుంతలమయంగా మారడంతో విద్యార్థులు తీవ్ర ఇబ్బందులు ఎదుర్కొంటున్నారు. పాఠశాలలకు వెళ్లేందుకు సరైన రహదారి సౌకర్యం లేకపోవడంతో ఆగ్రహం వ్యక్తం చేసిన విద్యార్థులు రోడ్డుపై బైఠాయించి ధర్నాకు దిగారు.

రహదారి పూర్తిగా దెబ్బతినడంతో నిత్యం పాఠశాలకు వెళ్లేందుకు ఇబ్బందులు పడుతున్నామని విద్యార్థులు తెలిపారు. వెంటనే రహదారికి మరమ్మతులు చేపట్టి రాకపోకలకు అనుకూలంగా మార్చాలని డిమాండ్ చేశారు. సమస్యను పరిష్కరించడంలో నిర్లక్ష్యం చేస్తున్నారంటూ బీజేపీ ఎమ్మెల్యే పాల్వాయి హరీష్ బాబుకు వ్యతిరేకంగా విద్యార్థులు నినాదాలు చేశారు.

తమ సమస్యను అధికారులు, ప్రజాప్రతినిధులు వెంటనే పట్టించుకుని రహదారి సౌకర్యం కల్పించాలని విద్యార్థులు కోరారు.