నేరళ్లపల్లిలో 9వ వార్షిక క్రికెట్ ప్రీమియర్ లీగ్‌కు అధ్యక్షుల సన్మానం
నేరళ్లపల్లి: గ్రామంలో నిర్వహించనున్న 9వ వార్షిక క్రికెట్ ప్రీమియర్ లీగ్ (CPL)కు అధ్యక్షులుగా నియమితులైన వారిని గ్రామ పెద్దలు, నాయకులు ఘనంగా సన్మానించారు. ఈ సందర్భంగా నూతన అధ్యక్షులకు శుభాకాంక్షలు తెలిపారు.
కార్యక్రమంలో నేరళ్లపల్లి గ్రామ సర్పంచ్ సమీనా జమీర్ పాషా, వాయిలకుంట గ్రామ సర్పంచ్ నీలమ్మ లింగు నాయక్, MRPS మండల అధ్యక్షుడు రేవల్లి కృష్ణతో పాటు గ్రామ పెద్దలు కాశన్న, మూడావత్ రాజు, ప్రేమ్ కుమార్, రాజునాయక్, లక్ష్మణ్ నాయక్, రేవల్లి శివ, మహమ్మద్ ఫెరోజ్ తదితరులు పాల్గొని నూతన అధ్యక్షులను సన్మానించారు.
ఈ సందర్భంగా వారు మాట్లాడుతూ.. గ్రామీణ ప్రాంతాల్లో క్రికెట్ వంటి క్రీడలు యువతలో ఐక్యత, క్రీడాస్ఫూర్తి, స్నేహభావాన్ని పెంపొందించడంలో కీలక పాత్ర పోషిస్తాయని అన్నారు. 9వ వార్షిక క్రికెట్ ప్రీమియర్ లీగ్‌ను విజయవంతంగా నిర్వహించి, గ్రామీణ ప్రాంతాల్లోని యువ క్రీడాకారుల్లో ఉన్న ప్రతిభను వెలికితీయాలని ఆకాంక్షించారు.
యువత చదువుతో పాటు క్రీడలపై కూడా ఆసక్తి పెంచుకోవాలని సూచించారు. క్రీడల్లో ప్రతిభ కనబరిచే యువతకు సరైన వేదిక లభిస్తే రాష్ట్ర, జాతీయ స్థాయిలో రాణించే అవకాశం ఉంటుందని పేర్కొన్నారు. గ్రామీణ ప్రాంతాల్లో క్రీడా ప్రతిభను ప్రోత్సహించేందుకు ఇలాంటి టోర్నమెంట్లను మరిన్ని నిర్వహించాల్సిన అవసరం ఉందన్నారు.
9వ వార్షిక క్రికెట్ ప్రీమియర్ లీగ్‌ను క్రీడాస్ఫూర్తితో, విజయవంతంగా నిర్వహించేందుకు అందరూ సహకరించాలని నిర్వాహకులు కోరారు. కార్యక్రమంలో గ్రామ యువకులు, క్రీడాకారులు, క్రీడాభిమానులు పాల్గొన్నారు.
