తెలంగాణలో పలు జిల్లాలకు వర్ష సూచన.. ఎల్లో అలర్ట్ జారీ

గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం

హైదరాబాద్ (ఎన్ టుడే న్యూస్), నవంబర్ 7: తెలంగాణలోని పలు జిల్లాల్లో ఆదివారం ఉదయం వరకు ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. ఈ నేపథ్యంలో తొమ్మిది జిల్లాలకు ఎల్లో అలర్ట్ జారీ చేసింది.

భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, జనగామ, రంగారెడ్డి, నాగర్‌కర్నూల్, యాదాద్రి భువనగిరి జిల్లాల్లో వర్షాలు కురిసే అవకాశం ఉందని వాతావరణ కేంద్రం వెల్లడించింది.

వర్షాల సమయంలో ఆయా జిల్లాల్లో గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. ప్రజలు అప్రమత్తంగా ఉండాలని సూచించింది. ఉరుములు, మెరుపులు సంభవించే సమయంలో చెట్ల కింద ఆశ్రయం పొందవద్దని, సురక్షిత ప్రదేశాల్లో ఉండాలని హెచ్చరించింది.