రోడ్డు భద్రతపై విద్యార్థులకు అవగాహన

సెయింట్ జోసెఫ్ పబ్లిక్ స్కూల్‌లో ‘అరైవ్ అలైవ్’ కార్యక్రమం.. ట్రాఫిక్ నిబంధనలపై మలక్‌పేట పోలీసుల సూచనలు

హైదరాబాద్, నవంబర్ 14 (ఎన్ టుడే న్యూస్): రోడ్డు ప్రమాదాల నివారణ ప్రతి ఒక్కరి బాధ్యత అని, ట్రాఫిక్ నిబంధనలు తప్పనిసరిగా పాటిస్తూ సురక్షిత ప్రయాణం చేయాలని మలక్‌పేట ట్రాఫిక్ పోలీసులు విద్యార్థులకు అవగాహన కల్పించారు. రోడ్డు భద్రతపై చిన్ననాటి నుంచే అవగాహన పెంపొందించాలనే ఉద్దేశంతో శనివారం సెయింట్ జోసెఫ్ పబ్లిక్ స్కూల్‌లో ‘అరైవ్ అలైవ్’ కార్యక్రమాన్ని నిర్వహించారు. ఈ కార్యక్రమంలో సుమారు 150 మంది విద్యార్థులు పాల్గొన్నారు.

ఈ సందర్భంగా ఎస్‌ఐ-1 ఎన్. వినోద్ కుమార్, మొబైల్-2 సిబ్బంది విద్యార్థులకు రోడ్డు భద్రతకు సంబంధించిన పలు కీలక అంశాలను వివరించారు. ద్విచక్ర వాహనదారులు తప్పనిసరిగా హెల్మెట్ ధరించాలని, కార్లలో ప్రయాణించే వారు సీట్‌బెల్ట్ పెట్టుకోవాలని సూచించారు. మైనర్ పిల్లలకు వాహనాలు ఇవ్వకూడదని, డ్రైవింగ్ చేసే సమయంలో సెల్‌ఫోన్ వినియోగించడం ప్రమాదకరమని హెచ్చరించారు.

అలాగే రాంగ్‌రూట్‌లో ప్రయాణించకుండా, లేన్ క్రమశిక్షణ పాటించాలని, ఇతర వాహనాలను ఓవర్‌టేక్ చేసే సమయంలో తగిన జాగ్రత్తలు తీసుకోవాలని వివరించారు. మద్యం సేవించి వాహనాలు నడపడం వల్ల ప్రమాదాలు జరిగే అవకాశాలు ఎక్కువగా ఉంటాయని, అలాంటి చర్యలకు దూరంగా ఉండాలని సూచించారు. రోడ్డు దాటే సమయంలో మొబైల్ ఫోన్ వినియోగించడం కూడా ప్రమాదకరమని, పాదచారులు రోడ్డుపైకి వెళ్లే ముందు ఇరువైపులా పరిశీలించి అప్రమత్తంగా ఉండాలని తెలిపారు.

ట్రాఫిక్ నిబంధనలు కేవలం జరిమానాల నుంచి తప్పించుకోవడానికి మాత్రమే కాకుండా, ప్రాణాలను రక్షించేందుకు రూపొందించబడ్డాయని పోలీసులు వివరించారు. ప్రతి ఒక్కరూ రహదారి భద్రతా నియమాలను పాటించడం ద్వారా తమ ప్రాణాలతో పాటు ఇతరుల ప్రాణాలను కూడా కాపాడవచ్చని పిలుపునిచ్చారు.

మలక్‌పేట ట్రాఫిక్ పోలీసుల ఆధ్వర్యంలో ట్రాఫిక్ పోలీస్ స్టేషన్‌కు చెందిన కె. ఆది రెడ్డి, డెల్టా-29 నేతృత్వంలో ఈ కార్యక్రమం నిర్వహించారు. విద్యార్థులకు రోడ్డు భద్రతపై అవగాహన కల్పించడమే కార్యక్రమ ప్రధాన ఉద్దేశంగా కొనసాగింది.