చిన్నారి ప్రాణాలు కాపాడిన సోనూసూద్

గుండె జబ్బుతో బాధపడుతున్న ఏడాది బాలికకు విజయవంతంగా శస్త్రచికిత్స

గుండె సంబంధిత వ్యాధితో బాధపడుతున్న ఏడాది చిన్నారికి సహాయం చేసి నటుడు సోనూసూద్ మరోసారి తన సేవా దృక్పథాన్ని చాటుకున్నారు. తన మనవరాలు రాధిక ప్రాణాలను కాపాడాలని 90 ఏళ్ల వృద్ధురాలు తనను ఆశ్రయించారని సోనూసూద్ వెల్లడించారు.

ఈ మేరకు వృద్ధురాలికి సంబంధించిన వీడియోను సోషల్ మీడియాలో షేర్ చేశారు. దేవుడి దయతో చిన్నారి రాధికకు శస్త్రచికిత్స విజయవంతంగా పూర్తయిందని తెలిపారు. చిన్నారి గుండె మళ్లీ కొట్టుకునేలా అవకాశం కల్పించామని, దీంతో ఆ వృద్ధురాలి ముఖంలో మరోసారి చిరునవ్వు కనిపించిందని పేర్కొన్నారు. చిన్నారి చికిత్సలో భాగస్వాములైన వైద్యుల బృందానికి సోనూసూద్ కృతజ్ఞతలు తెలిపారు.