షిరిడీ సాయిబాబా సంస్థానంలో ప్రత్యేక దీపాలంకరణ మహోత్సవం

హైదరాబాద్, నవంబర్ 6 (ఎన్ టుడే న్యూస్):

దీపావళి పర్వదినాన్ని పురస్కరించుకుని ఈ నెల 8వ తేదీ ఆదివారం షిరిడీ సాయిబాబా సంస్థానంలో ప్రత్యేక దీపాలంకరణ మహోత్సవాన్ని వైభవంగా నిర్వహించేందుకు ఏర్పాట్లు చేశారు.

ఈ సందర్భంగా సాయంత్రం 4 గంటలకు శ్రీ ధనలక్ష్మి పూజ నిర్వహించనున్నారు. అనంతరం సాయంత్రం 6 గంటలకు ప్రతిరోజూ జరిగే సంధ్యా హారతి (ధూప్ హారతి) కార్యక్రమాన్ని ప్రత్యేకంగా నిర్వహించనున్నారు. ఆరోజు సంస్థానంలో విద్యుత్ దీపాలను వినియోగించకుండా సంప్రదాయ దీపాలతో ప్రత్యేక అలంకరణ చేపట్టి, దీపాల వెలుగుల మధ్య సాయిబాబాకు హారతి సమర్పించనున్నారు.

ఈ ప్రత్యేక దీపాలంకరణ మహోత్సవం రాత్రి 10.30 గంటలకు జరిగే శేజ్ హారతి వరకు కొనసాగనుంది. ఈ సందర్భంగా భక్తులకు శ్రీ ధనలక్ష్మి అమ్మవారి తీర్థప్రసాదాలతో పాటు, శ్రీ షిరిడీ సాయిబాబా వారి తీర్థప్రసాదాలను అందించనున్నారు.

భక్తులందరూ ఈ ప్రత్యేక దీపాలంకరణ మహోత్సవానికి హాజరై పూజా కార్యక్రమాల్లో పాల్గొని, స్వామివారి తీర్థప్రసాదాలను స్వీకరించాలని సంస్థాన నిర్వాహకులు కోరారు.