విజయవాడ ఉత్సవ్ 2.0కు తెలంగాణ సీఎం రేవంత్ రెడ్డికి ఆహ్వానం

దసరా ఉత్సవాలు, విజయవాడ ఉత్సవ్ 2.0కు తెలంగాణ సీఎం రేవంత్ రెడ్డికి ఆహ్వానం

విజయవాడ: విజయవాడలో ఘనంగా నిర్వహించనున్న దసరా శరన్నవరాత్రి ఉత్సవాలు, విజయవాడ ఉత్సవ్ 2.0లో పాల్గొనాలని తెలంగాణ ముఖ్యమంత్రి ఎ. రేవంత్ రెడ్డిని విజయవాడ ఎంపీలు కేశినేని శివనాథ్ (చిన్ని), సాన సతీష్ బాబు, ఎంపీ భరత్ ఆహ్వానించారు. ఈ సందర్భంగా విజయవాడ నగర ఆధ్యాత్మిక, సాంస్కృతిక, చారిత్రక వైభవాన్ని చాటిచెప్పేలా నిర్వహించనున్న ఉత్సవాల్లో పాల్గొని వేడుకలను ఆస్వాదించాలని కోరారు. ఇంద్రకీలాద్రిపై కొలువైన శ్రీ కనకదుర్గమ్మవారి దివ్య ఆశీస్సులు పొందేందుకు విజయవాడకు రావాలని తెలంగాణ ముఖ్యమంత్రికి ఆహ్వానం పలికారు. విజయవాడ దసరా ఉత్సవాలు, విజయవాడ ఉత్సవ్ 2.0ను జాతీయ స్థాయిలో ప్రాచుర్యంలోకి తీసుకెళ్లే లక్ష్యంతో వివిధ రాష్ట్రాల ముఖ్యమంత్రులు, కేంద్ర మంత్రులు, ఇతర ప్రముఖులను ఎంపీలు ఆహ్వానిస్తున్నారు. ఈ ఉత్సవాల ద్వారా విజయవాడ నగర ఆధ్యాత్మిక ప్రాశస్త్యంతో పాటు సాంస్కృతిక సంప్రదాయాలు, చారిత్రక విశిష్టతను దేశవ్యాప్తంగా చాటిచెప్పేందుకు నిర్వాహకులు కృషి చేస్తున్నారు.