తిరుపతి జిల్లాలో రోడ్డు ప్రమాదం.. టైరు పంచరై బోల్తాపడ్డ తుఫాన్ వాహనం.. ముగ్గురికి గాయాలు

తిరుపతి జిల్లా పుల్లంపేట మండల పరిధిలో శనివారం రోడ్డు ప్రమాదం చోటుచేసుకుంది. తిరుమలలో వెంకటేశ్వర స్వామిని దర్శించుకుని కర్నూలు జిల్లాకు తిరుగు ప్రయాణం అవుతున్న భక్తులు ప్రయాణిస్తున్న తుఫాన్ వాహనం టైరు పంచర్ కావడంతో అదుపుతప్పి బోల్తాపడింది.

ఈ ప్రమాదంలో ముగ్గురు ప్రయాణికులు గాయపడగా, స్థానికులు వెంటనే స్పందించి వారిని రాజంపేట ప్రభుత్వ ఆసుపత్రికి తరలించారు. గాయపడిన వారికి చికిత్స అందిస్తున్నట్లు వైద్యులు తెలిపారు.

ప్రమాద సమాచారం అందుకున్న పుల్లంపేట పోలీసులు సంఘటనా స్థలానికి చేరుకుని సహాయక చర్యలు చేపట్టారు. ఈ ఘటనపై కేసు నమోదు చేసి దర్యాప్తు ప్రారంభించారు. ప్రమాదానికి సంబంధించిన పూర్తి వివరాలు తెలియాల్సి ఉంది.