కట్టలేరు వంతెన నిర్మాణం వెంటనే చేపట్టాలి

గంపలగూడెం: ఎన్టీఆర్ జిల్లా తిరువూరు నియోజకవర్గం గంపలగూడెం మండలం వినగడప వద్ద కట్టలేరు వంతెనపై శుక్రవారం వరద ఉధృతిని జనసేన పార్టీ నాయకులు క్షేత్రస్థాయిలో పరిశీలించారు. తిరువూరు నియోజకవర్గ జనసేన పార్టీ సమన్వయకర్త మనుబోలు శ్రీనివాసరావు, మండల జనసేన పార్టీ అధ్యక్షుడు చింతలపాటి వెంకటకృష్ణారావు ఆధ్వర్యంలో నాయకులు వంతెన పరిస్థితిని పరిశీలించారు.

ఈ సందర్భంగా వారు మాట్లాడుతూ కూటమి ప్రభుత్వం అధికారంలోకి వచ్చిన వెంటనే కట్టలేరుపై హై లెవెల్ బ్రిడ్జి నిర్మాణం చేపడతామని గతంలో హామీ ఇచ్చినట్లు తెలిపారు. వంతెన నిర్మాణానికి రూ.50 కోట్ల పరిపాలనా అనుమతులు మంజూరైనట్లు వివరించారు. ఈ సమస్యను ఉప ముఖ్యమంత్రి పవన్ కళ్యాణ్ దృష్టికి పలుమార్లు తీసుకెళ్లినట్లు పేర్కొన్నారు.

వరదల సమయంలో వంతెనపై రాకపోకలకు తీవ్ర ఇబ్బందులు ఎదురవుతున్నాయని, ప్రజల సమస్యలను దృష్టిలో ఉంచుకుని అధికారులు వెంటనే స్పందించి నిర్మాణ పనులు ప్రారంభించాలని జనసేన నాయకులు కోరారు. వంతెన నిర్మాణంలో జాప్యం కొనసాగితే కూటమిలో భాగస్వామిగా ఉన్నప్పటికీ ప్రజల కోసం ప్రత్యక్ష పోరాటానికి సిద్ధమని స్పష్టం చేశారు.

ఈ కార్యక్రమంలో జనసేన నాయకులు ఎస్కే నాగుల్ మీరా, ఒట్టికుంట కృష్ణ, డైరెక్టర్ మాధవరావు మల్యాల, పీఏసీఎస్ చైర్మన్ కస్తూరి సీతారామస్వామి, ఆరేపల్లి నవీన్, లింగినేని సుధాకర్, పర్షా పుల్లారావు, చెన్న కృష్ణారావు తదితరులు పాల్గొన్నారు.