దేశవ్యాప్తంగా పాఠ్యపుస్తకాల్లో పైడిమర్రి వెంకట సుబ్బారావు పేరు చేర్చాలి

ప్రముఖులకు విజ్ఞప్తి చేసిన ఉపాధ్యాయుడు రాం ప్రదీప్

తిరువూరు (ఎన్టీఆర్ జిల్లా): విద్యార్థుల్లో దేశభక్తి, జాతీయ భావన, సోదరభావాన్ని పెంపొందించే భారతదేశ ప్రతిజ్ఞను రచించిన పైడిమర్రి వెంకట సుబ్బారావు పేరును దేశవ్యాప్తంగా పాఠ్యపుస్తకాల్లో చేర్చేందుకు కృషి చేయాలని ఆంగ్ల ఉపాధ్యాయుడు, జన విజ్ఞాన వేదిక ప్రతినిధి ఎం. రాం ప్రదీప్ పలువురు ప్రముఖులకు విజ్ఞప్తి చేశారు. ఆదివారం గుంటూరులో నిర్వహించిన కార్యక్రమంలో సర్వేపల్లి ప్రతిభా పురస్కారాన్ని స్వీకరించిన సందర్భంగా ఆయన ఈ అంశాన్ని ప్రముఖుల దృష్టికి తీసుకెళ్లారు.

ఈ కార్యక్రమానికి ముఖ్య అతిథులుగా హాజరైన ప్రముఖ గాయకుడు గజల్ శ్రీనివాస్, మాజీ ఎమ్మెల్సీ కె.ఎస్. లక్ష్మణరావు తదితరులను కలిసి పైడిమర్రి వెంకట సుబ్బారావు సేవలను విద్యార్థి లోకానికి మరింత విస్తృతంగా పరిచయం చేయాల్సిన అవసరాన్ని వివరించారు. దేశవ్యాప్తంగా పాఠ్యపుస్తకాల్లో ఆయన పేరు, జీవిత విశేషాలకు తగిన స్థానం కల్పించేలా సంబంధిత వర్గాలు చొరవ తీసుకోవాలని కోరారు.

ఈ సందర్భంగా పైడిమర్రి వెంకట సుబ్బారావు జీవిత చరిత్రపై తాను రచించిన పుస్తకాలను ప్రముఖులకు అందజేశారు. భారతదేశ ప్రతిజ్ఞ ద్వారా విద్యార్థుల్లో దేశం పట్ల గౌరవం, ఐక్యత, బాధ్యతాయుతమైన పౌరసత్వ భావనలను పెంపొందించడంలో కీలక పాత్ర పోషించిన ఆయన జీవితాన్ని భావితరాలకు పరిచయం చేయడం అవసరమని రాం ప్రదీప్ పేర్కొన్నారు. పైడిమర్రి సేవలకు తగిన గుర్తింపు లభించేలా కృషి జరగాలని ఆయన ఆకాంక్షించారు.