రాజాం డీఏవీ పాఠశాలలో కట్టుదిట్టమైన భద్రత

భద్రత మధ్య ఎంపీటీసీ, జెడ్పీటీసీ ఓట్ల లెక్కింపు 

కౌంటింగ్ సిబ్బందికి సీఐ ఉపేంద్ర సూచనలు.. 70 మంది పోలీసులతో పర్యవేక్షణ

రాజాం, విజయనగరం జిల్లా (ఎన్ టుడే న్యూస్): ఎంపీటీసీ, జెడ్పీటీసీ ఎన్నికల ఓట్ల లెక్కింపు నేపథ్యంలో రాజాంలోని డీఏవీ పాఠశాల వద్ద పోలీసులు కట్టుదిట్టమైన భద్రతా ఏర్పాట్లు చేపట్టారు. కౌంటింగ్ ప్రక్రియ ప్రశాంతంగా, ఎలాంటి అవాంఛనీయ సంఘటనలు జరగకుండా నిర్వహించేందుకు పోలీసు అధికారులు ప్రత్యేక చర్యలు తీసుకున్నారు.

ఈ సందర్భంగా కౌంటింగ్ కేంద్రంలో విధులు నిర్వహిస్తున్న సిబ్బందికి సీఐ ఉపేంద్ర పలు సూచనలు చేశారు. కౌంటింగ్ విధుల్లో ఉన్న ఉద్యోగులు అవసరం లేకుండా పదేపదే లోపలికి, బయటికి తిరగకూడదని స్పష్టం చేశారు. కౌంటింగ్ కేంద్రం లోపలికి మొబైల్ ఫోన్లను అనుమతించబోమని తెలిపారు. ఎన్నికల కౌంటింగ్ నిబంధనలను ప్రతి ఒక్కరూ తప్పనిసరిగా పాటించాలని సూచించారు.

సీఐ నవీన్ కుమార్, సీఐ ఉపేంద్ర ఆధ్వర్యంలో ఐదుగురు ఎస్‌ఐలు, సుమారు 70 మంది పోలీసు సిబ్బంది భద్రతా విధుల్లో పాల్గొంటున్నారు. ఉదయం 7 గంటల నుంచి కౌంటింగ్ పూర్తయ్యే వరకు కేంద్రం చుట్టూ 200 మీటర్ల పరిధిలో ప్రజలు ఉండకూడదని పోలీసులు ఆంక్షలు విధించారు. ఆ ప్రాంతంలో రాకపోకలను కూడా నిలిపివేశారు.

కౌంటింగ్ కేంద్రం పరిసరాల్లో ప్రజలు, రాజకీయ నాయకులు గుమిగూడకుండా పోలీసు సిబ్బంది పర్యవేక్షిస్తున్నారు. ఎన్నికల ప్రక్రియ సజావుగా సాగేందుకు ప్రజలు, వివిధ రాజకీయ పార్టీల నాయకులు, కార్యకర్తలు పోలీసులకు సహకరించాలని అధికారులు విజ్ఞప్తి చేశారు.