చండ్రుపట్లలో అగ్ని అస్త్రం తయారీపై అవగాహన

ఎన్టీఆర్ జిల్లా తిరువూరు నియోజకవర్గం విస్సన్నపేట మండలం చండ్రుపట్ల గ్రామంలో ప్రకృతి వ్యవసాయ పద్ధతుల్లో భాగంగా అగ్ని అస్త్రం తయారీ కార్యక్రమం నిర్వహించారు. ఐసీఆర్‌పీ విస్సంపల్లి విజయలక్ష్మి ఇంటి వద్ద అగ్ని అస్త్రాన్ని తయారు చేశారు.

వరి పంటలో కాండం తొలుచు పురుగు, వంగ, బెండ, కంది తదితర పంటల్లో కాయ తొలుచు పురుగుల నివారణకు అగ్ని అస్త్రాన్ని ఉపయోగించవచ్చని ప్రకృతి వ్యవసాయ సిబ్బంది తెలిపారు. అలాగే ఆకు ముడత పురుగుల నివారణకు కూడా ఇది ఉపయోగపడుతుందని వివరించారు.

తయారీకి కావాల్సిన పదార్థాలు:

వేప ఆకుల ముద్ద – 5 కిలోలు

పచ్చిమిర్చి పేస్ట్ – 1 కిలో

పొగాకు – 1 కిలో

వెల్లుల్లి పేస్ట్ – 500 గ్రాములు

నీరు – 10 లీటర్లు

తయారీ విధానం:

మట్టి కుండలో 10 లీటర్ల నీటిని పోసి మరిగించి, అందులో వేప ఆకుల ముద్ద, పచ్చిమిర్చి పేస్ట్, పొగాకు, వెల్లుల్లి పేస్ట్ వేసి ఐదు సార్లు పొంగు వచ్చే వరకు మరిగించాలి. అనంతరం మిశ్రమాన్ని సుమారు 48 గంటల పాటు చల్లార్చాలి. పూర్తిగా చల్లారిన తర్వాత వడకట్టి, అందులో 10 లీటర్ల గోమూత్రం కలపాలి. మిశ్రమాన్ని మరిగించే సమయంలో గోమూత్రం కలపకూడదని సూచించారు.

తయారైన అగ్ని అస్త్రాన్ని 100 లీటర్ల నీటికి 3 లీటర్ల చొప్పున కలిపి ఎకరా పంటపై పిచికారీ చేసుకోవచ్చని తెలిపారు. తయారు చేసిన అగ్ని అస్త్రాన్ని సుమారు మూడు నెలల వరకు నిల్వ చేసుకోవచ్చని వివరించారు.

ఈ కార్యక్రమంలో ప్రకృతి వ్యవసాయ శాఖ సిబ్బంది ఎఫ్‌ఎంటీ జి. శ్రీనివాస్‌రావు, ఐసీఆర్‌పీ వి. విజయలక్ష్మి, టి. ఐసీఆర్‌పీలు జి. భారతి, బి. శాంతి పాల్గొన్నారు.