రాష్ట్రస్థాయి ఖోఖో పోటీలకు ఉప్పరపల్లి విద్యార్థిని లావణ్య ఎంపిక

అండర్‌-17 ఎస్‌జీఎఫ్‌ఐ పోటీల్లో ప్రతిభ చాటిన విద్యార్థిని.. అభినందించిన పాఠశాల ఉపాధ్యాయులు

చెన్నారావుపేట, నవంబర్ 12: అండర్‌-17 స్కూల్ గేమ్స్ ఫెడరేషన్ ఆఫ్ ఇండియా (ఎస్‌జీఎఫ్‌ఐ) రాష్ట్రస్థాయి ఖోఖో పోటీలకు వరంగల్ జిల్లా చెన్నారావుపేట మండలం ఉప్పరపల్లి జిల్లా పరిషత్ ఉన్నత పాఠశాలకు చెందిన విద్యార్థిని లావణ్య ఎంపికైంది. జిల్లా స్థాయి పోటీల్లో ప్రతిభ కనబరిచి రాష్ట్రస్థాయి పోటీలకు అర్హత సాధించడంతో పాఠశాల ఉపాధ్యాయులు, విద్యార్థులు హర్షం వ్యక్తం చేశారు.

అక్టోబర్ 31న నిర్వహించిన ఉమ్మడి వరంగల్ జిల్లా స్థాయి ఖోఖో పోటీల్లో లావణ్య అత్యుత్తమ ప్రతిభ కనబరిచినట్లు పాఠశాల ప్రధానోపాధ్యాయురాలు తేజావత్ జయ, వ్యాయామ ఉపాధ్యాయురాలు వీరగోని స్వప్న తెలిపారు. ఆమె ఆటతీరును గుర్తించి రాష్ట్రస్థాయి పోటీలకు ఎంపిక చేసినట్లు పేర్కొన్నారు.

రాష్ట్రస్థాయి అండర్‌-17 ఖోఖో పోటీలు నవంబర్ 13, 14, 15 తేదీల్లో మేడ్చల్ జిల్లా తుమ్ముకుంట జిల్లా పరిషత్ ఉన్నత పాఠశాలలో జరగనున్నాయని తెలిపారు. ఈ పోటీల్లో కూడా లావణ్య ప్రతిభ కనబరిచి పాఠశాలకు, జిల్లాకు మంచి పేరు తీసుకురావాలని ప్రధానోపాధ్యాయురాలు తేజావత్ జయ ఆకాంక్షించారు.

రాష్ట్రస్థాయి పోటీలకు ఎంపికైన విద్యార్థిని లావణ్యతో పాటు ఆమెకు శిక్షణ, ప్రోత్సాహం అందించిన వ్యాయామ ఉపాధ్యాయురాలు వీరగోని స్వప్నను ప్రధానోపాధ్యాయురాలు జయ ప్రత్యేకంగా అభినందించారు. విద్యార్థినులు క్రీడల్లో రాణించేందుకు ఉపాధ్యాయుల ప్రోత్సాహం, కృషి ఎంతో ముఖ్యమని ఈ సందర్భంగా పేర్కొన్నారు.

ఈ కార్యక్రమంలో ఉపాధ్యాయులు సునీత, శశిధర్, సంతోష్ కుమార్, పిన్నింటి బాలాజీరావు, మొగిలి, సుందర్, సతీష్ కుమార్, రామకృష్ణ, క్రాఫ్ట్ టీచర్ ఇందిర, జూనియర్ అసిస్టెంట్ జాహెద్ తదితరులు లావణ్యకు అభినందనలు తెలిపారు.