విస్సన్నపేటలో మొరాయించిన ఫైర్ ఇంజన్
విస్సన్నపేటలో మొరాయించిన ఫైర్ ఇంజన్
ఎన్టీఆర్ జిల్లా విస్సన్నపేట: అత్యవసర పరిస్థితుల్లో ప్రజల ప్రాణాలను, ఆస్తులను కాపాడాల్సిన అగ్నిమాపక వాహనం మొరాయించడంతో విస్సన్నపేటలో ఆందోళనకర పరిస్థితి నెలకొంది. ఫైర్ ఇంజన్ పనిచేయకపోవడంతో సిబ్బంది దారిన వెళ్లే వారిని బ్రతిమిలాడి వాహనాన్ని నెట్టించాల్సిన పరిస్థితి ఏర్పడింది.
అగ్నిప్రమాదం లేదా ఇతర అత్యవసర పరిస్థితుల్లో సమాచారం అందితే మొరాయిస్తున్న ఫైర్ ఇంజన్తో సిబ్బంది ఎలా స్పందిస్తారంటూ స్థానిక ప్రజలు బహిరంగంగానే ప్రశ్నిస్తున్నారు. అత్యవసర సేవలకు సంబంధించిన వాహనాన్ని తక్షణమే మరమ్మతు చేసి అందుబాటులో ఉంచాలని కోరుతున్నారు.
ఇదిలా ఉండగా, ఫైర్ ఇంజన్ పరిస్థితిని విలేకరులు వీడియో చిత్రీకరిస్తుండగా కొందరు అల్లరి మూకలు వారిపై దౌర్జన్యానికి దిగడం మరింత వివాదాస్పదంగా మారింది. ఈ ఘటనపై అధికారులు స్పందించి, ఫైర్ ఇంజన్ను పూర్తిస్థాయిలో పరిశీలించి అత్యవసర సేవలకు ఆటంకం లేకుండా చర్యలు తీసుకోవాలని ప్రజలు కోరుతున్నారు.
