రేషన్ దుకాణాల్లో రాయితీ ధరలకు కందిపప్పు, గోధుమ పిండి, పామాయిల్ ధరల భారాన్ని తగ్గించేందుకు ఏపీ ప్రభుత్వ నిర్ణయం..

మూడు నెలలకు రూ.300.60 కోట్ల కేటాయింపు అమరావతి: పెరుగుతున్న నిత్యావసర వస్తువుల ధరలతో ఇబ్బందులు ఎదుర్కొంటున్న సామాన్య ప్రజలకు ఉపశమనం కల్పించే దిశగా ఆంధ్రప్రదేశ్ ప్రభుత్వం కీలక నిర్ణయం తీసుకుంది. ఇకపై రేషన్ దుకాణాల ద్వారా కందిపప్పు, గోధుమ పిండి, పామాయిల్‌ను రాయితీ ధరలకు పంపిణీ చేయాలని నిర్ణయించింది. ఇందులో భాగంగా కిలో కందిపప్పును రూ.100కు, కిలో గోధుమ పిండిని రూ.25కు, లీటరు పామాయిల్‌ను రూ.125కే అందించనుంది. ముఖ్యమంత్రి చంద్రబాబు ఇటీవల ఇచ్చిన ఆదేశాల మేరకు మూడు నెలలకు సరిపడా నిత్యావసర సరుకులపై రాయితీ కల్పించేందుకు ప్రభుత్వం రూ.300.60 కోట్లను కేటాయించింది. రేషన్ దుకాణాల ద్వారా ఈ సరుకులను ప్రజలకు అందుబాటులోకి తీసుకురావడం ద్వారా మార్కెట్ ధరల భారాన్ని కొంతవరకు తగ్గించవచ్చని ప్రభుత్వం భావిస్తోంది. నాణ్యమైన నిత్యావసర సరుకులను తక్కువ ధరలకు అందించి సామాన్య కుటుంబాలకు ఆర్థికంగా తోడ్పాటు అందించడమే ఈ నిర్ణయం ప్రధాన ఉద్దేశం.