కొండపర్వలో అక్రమ రేషన్ బియ్యం పట్టివేత.. 20 క్వింటాళ్లు సీజ్

విస్సన్నపేట మండలంలో రెవెన్యూ అధికారుల దాడులు విస్సన్నపేట మండలం కొండపర్వ గ్రామంలో అక్రమంగా రేషన్ బియ్యం తరలిస్తున్న వ్యవహారాన్ని రెవెన్యూ శాఖ అధికారులు గుర్తించారు. గ్రామస్తుల నుంచి అందిన ఫిర్యాదు మేరకు స్పందించిన అధికారులు, నడిపల్లి హరిబాబుకు చెందిన రేషన్ దుకాణంలో తనిఖీలు నిర్వహించారు. ఈ సందర్భంగా సుమారు 20 క్వింటాళ్ల రేషన్ బియ్యాన్ని తరలిస్తున్నట్లు గుర్తించి స్వాధీనం చేసుకున్నారు. సమాచారం అందుకున్న పీడీఎస్ నాగరాజు, రెవెన్యూ ఇన్‌స్పెక్టర్ సుజాత, గ్రామ రెవెన్యూ అధికారి తదితర సిబ్బంది ఈ దాడిలో పాల్గొన్నారు. అక్రమంగా రేషన్ బియ్యం నిల్వ చేయడం, తరలించడం వంటి చర్యలపై అధికారులు తనిఖీలు చేపట్టి బియ్యాన్ని స్వాధీనం చేసుకున్నారు. పేదలకు ప్రభుత్వం అందిస్తున్న ఉచిత రేషన్ బియ్యం పక్కదారి పట్టకుండా నిఘా కొనసాగిస్తామని అధికారులు తెలిపారు.