గోదావరి పుష్కరాలకు ముందే పనులు పూర్తి చేస్తాం

గోదావరి పుష్కరాలకు ముందే పనులు పూర్తి చేస్తాం: మంత్రి అడ్లూరి లక్ష్మణ్ కుమార్

​వెల్గటూర్  సెప్టెంబర్ 24 

2027లో నిర్వహించే గోదావరి పుష్కరాలకు ముందే అన్ని నిర్మాణ పనులను పూర్తి చేస్తామని రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్ స్పష్టం చేశారు. గురువారం జగిత్యాల జిల్లా వెల్గటూర్ మండలం కోటిలింగాల గ్రామంలో పుష్కర ఘాట్లు, శ్రీ కోటేశ్వర స్వామి ఆలయ పునర్ నిర్మాణ పనులకు జిల్లా కలెక్టర్ సత్యప్రసాద్‌తో కలిసి మంత్రి శంకుస్థాపన చేశారు.

ఈ సందర్భంగా మంత్రి మాట్లాడుతూ, 2027 గోదావరి పుష్కరాల సందర్భంగా బాసర నుంచి భద్రాచలం వరకు ఉన్న ఆలయాలను సమగ్రంగా అభివృద్ధి చేయడమే కాకుండా, భక్తులకు ఎలాంటి ఇబ్బందులు కలగకుండా అన్ని సౌకర్యాలు కల్పిస్తున్నట్లు తెలిపారు.

​ప్రధానాంశాలు:

​ధర్మపురి నియోజకవర్గానికి రూ.117 కోట్లు: పుష్కర పనుల నిమిత్తం ప్రభుత్వం ఇప్పటికే ఈ నిధులను కేటాయించింది. ఇటీవల ఉప ముఖ్యమంత్రి మల్లు భట్టి విక్రమార్క పర్యటనలో కోరిన రూ.80 కోట్లకు గానూ రూ.81 కోట్లు మంజూరు చేశారు.

​కోటిలింగాల ఆలయాభివృద్ధి: శ్రీ కోటేశ్వర స్వామి ఆలయ అభివృద్ధికి రూ.10 కోట్లు, పుష్కర ఘాట్ల నిర్మాణానికి రూ.16.13 కోట్లు కేటాయించారు.

డెడ్‌లైన్ ఫిబ్రవరి 29, 2027: శంకుస్థాపన చేసిన ఈ పనులన్నింటినీ 2027 ఫిబ్రవరి 29 లోపు పూర్తి చేయాలని మంత్రి అధికారులను ఆదేశించారు.

​స్థానిక ప్రజాప్రతినిధులు, అధికారులు పరస్పర సమన్వయంతో పనిచేసి పనులను వేగవంతం చేయాలని సూచించారు. అనంతరం, ప్రభుత్వం చేపట్టిన "తల్లిదండ్రులు, వయోవృద్ధులు, దివ్యాంగుల వారోత్సవాల" పోస్టర్‌ను మంత్రి కలెక్టర్ సత్యప్రసాద్‌తో కలిసి ఆవిష్కరించారు

.