భర్తపై భార్య దాడి.. ప్రైవేట్ పార్ట్ కోసిందని ఫిర్యాదు
మీరట్‌: ఉత్తరప్రదేశ్‌లోని మీరట్‌ నగరంలో భార్యాభర్తల మధ్య వివాదం తీవ్ర ఘటనకు దారితీసింది. లిసారి గేట్‌ పోలీస్‌ స్టేషన్‌ పరిధిలో భర్త నదీమ్‌ తన భార్య షబ్నమ్‌పై తీవ్ర ఆరోపణలు చేయగా, పోలీసులు ఆమెను అరెస్టు చేసి దర్యాప్తు చేపట్టారు.
పోలీసులు, బాధితుడి ఫిర్యాదు ప్రకారం.. నదీమ్‌, షబ్నమ్‌లకు ఏడేళ్ల క్రితం వివాహమైంది. అయితే, వారికి పిల్లలు కలగలేదని తెలుస్తోంది. కొంతకాలంగా షబ్నమ్‌ మరో వ్యక్తితో ఫోన్‌లో మాట్లాడుతోందనే అనుమానంతో దంపతుల మధ్య తరచూ గొడవలు జరుగుతున్నాయని నదీమ్‌ ఆరోపించాడు.
అక్టోబర్‌ 7న కూడా ఇద్దరి మధ్య గొడవ జరిగిందని, అనంతరం తాను నిద్రపోయిన సమయంలో తెల్లవారుజామున 2.30 గంటలకు షబ్నమ్‌ తనపై దాడి చేసి ప్రైవేట్ పార్ట్‌ను కోసిందని నదీమ్‌ ఫిర్యాదులో పేర్కొన్నాడు.
మరోవైపు, తన భర్త మరో వివాహానికి సిద్ధమవుతున్నందునే ఈ ఘటనకు పాల్పడినట్లు షబ్నమ్‌ తెలిపినట్లు సమాచారం. ఈ ఘటనకు సంబంధించి పోలీసులు కేసు నమోదు చేసి, దాడికి గల కారణాలు, పూర్తి వివరాలపై దర్యాప్తు చేస్తున్నారు. నిందితురాలిపై వచ్చిన ఆరోపణలు కోర్టులో నిరూపించాల్సి ఉంది.
