భారత నీటి నిర్వహణ విధానాలపై ప్రపంచ బ్యాంక్ ప్రశంసలు

జల్ జీవన్ మిషన్ ద్వారా ఏడేళ్లలో 80 కోట్ల మందికి స్వచ్ఛమైన తాగునీరు అందించామని వెల్లడి

న్యూఢిల్లీ (ఎన్ టుడే న్యూస్):

భారతదేశం అమలు చేస్తున్న నీటి నిర్వహణ విధానాలు, తాగునీటి సరఫరా కార్యక్రమాలు అద్భుతమైన ఫలితాలను సాధించాయని ప్రపంచ బ్యాంక్ గ్లోబల్ డైరెక్టర్ సరోజ్ కుమార్ ఝా ప్రశంసించారు. ముఖ్యంగా గ్రామీణ ప్రాంతాల్లో ప్రతి ఇంటికీ స్వచ్ఛమైన తాగునీరు అందించాలనే లక్ష్యంతో చేపట్టిన జల్ జీవన్ మిషన్ ద్వారా గణనీయమైన పురోగతి సాధించినట్లు ఆయన పేర్కొన్నారు.

జల్ జీవన్ మిషన్ ప్రారంభమైనప్పటి నుంచి ఏడేళ్ల కాలంలో సుమారు 80 కోట్ల మందికి స్వచ్ఛమైన తాగునీరు అందుబాటులోకి వచ్చిందని వెల్లడించారు. దేశవ్యాప్తంగా తాగునీటి సదుపాయాలను విస్తరించడంలో భారత్ అనుసరిస్తున్న విధానాలు, చేపడుతున్న చర్యలు ప్రాధాన్యత సంతరించుకున్నాయని వివరించారు.

నీటి వనరుల సమర్థ నిర్వహణ, ప్రజలకు సురక్షితమైన తాగునీరు అందించడం వంటి అంశాల్లో భారత్ సాధించిన అనుభవాలు ఇతర దేశాలకు కూడా ఉపయోగపడతాయని ఆయన అభిప్రాయపడ్డారు.

2026లో అబుదాబిలో జరగనున్న ఐక్యరాజ్యసమితి (యూఎన్) వాటర్ కాన్ఫరెన్స్‌లో భారతదేశం తన నీటి నిర్వహణ అనుభవాలు, జల్ జీవన్ మిషన్ ద్వారా సాధించిన పురోగతిని ప్రపంచ దేశాలతో పంచుకోవాలని సరోజ్ కుమార్ ఝా పిలుపునిచ్చారు. నీటి భద్రత, స్వచ్ఛమైన తాగునీటి సరఫరా వంటి ప్రపంచవ్యాప్త సవాళ్ల పరిష్కారానికి భారత్ అనుభవాలు దోహదపడతాయని పేర్కొన్నారు.