ప్రేమ పేరుతో మోసం చేశాడని.. యువతి ఆత్మహత్య

రెండేళ్ల ప్రేమ తర్వాత కులం పేరుతో పెళ్లికి నిరాకరించిన యువకుడు.. 21 పేజీల లేఖ రాసి బలవన్మరణానికి పాల్పడిన సుష్మిత (24)

మహబూబాబాద్: రెండేళ్లుగా ప్రేమించిన యువకుడు కులం వేరనే కారణంతో పెళ్లికి నిరాకరించడంతో తీవ్ర మనస్తాపానికి గురైన ఓ యువతి ఆత్మహత్యకు పాల్పడిన విషాద ఘటన మహబూబాబాద్ మండలం నడివాడ గ్రామంలో వెలుగుచూసింది. డిగ్రీ పూర్తి చేసి ప్రభుత్వ ఉద్యోగ పరీక్షలకు సిద్ధమవుతున్న సుష్మిత (24) ఈ ఘటనలో ప్రాణాలు కోల్పోయింది. ఆమె మరణంతో కుటుంబ సభ్యులు తీవ్ర విషాదంలో మునిగిపోయారు.

వివరాల్లోకి వెళితే.. నడివాడ గ్రామానికి చెందిన కుమారస్వామి–సుకన్య దంపతుల కుమార్తె సుష్మిత డిగ్రీ పూర్తి చేసిన అనంతరం ప్రభుత్వ ఉద్యోగాల కోసం పోటీ పరీక్షలకు సిద్ధమవుతోంది. ఇదే గ్రామానికి చెందిన అనిల్ అనే యువకుడితో ఆమె గత రెండేళ్లుగా ప్రేమలో ఉన్నట్లు సమాచారం. ఈ క్రమంలో ఇటీవల తనను వివాహం చేసుకోవాలని సుష్మిత అనిల్‌ను కోరినట్లు తెలుస్తోంది.

అయితే కులాలు వేరని, తన కుటుంబ సభ్యులు పెళ్లికి అంగీకరించరని చెబుతూ అనిల్ వివాహాన్ని వాయిదా వేస్తూ వచ్చినట్లు బాధితురాలి కుటుంబ సభ్యులు ఆరోపిస్తున్నారు. పలుమార్లు పెళ్లి విషయాన్ని ప్రస్తావించినప్పటికీ స్పష్టమైన సమాధానం రాకపోవడంతో సుష్మిత తీవ్ర మనస్తాపానికి గురైనట్లు సమాచారం.

ఈ పరిస్థితుల్లో సుష్మిత 21 పేజీల లేఖ రాసి ఆత్మహత్యకు పాల్పడినట్లు తెలిసింది. తనను మోసం చేసిన వారిని వదలవద్దంటూ తల్లిదండ్రులను కోరినట్లు సమాచారం. ఈ ఘటనతో ఆమె కుటుంబ సభ్యులు కన్నీరుమున్నీరవుతున్నారు.

తమ కుమార్తె మృతికి కారణమైన యువకుడిని అరెస్టు చేసి, ఘటనపై సమగ్ర విచారణ జరిపి బాధ్యులపై కఠిన చర్యలు తీసుకోవాలని సుష్మిత కుటుంబ సభ్యులు డిమాండ్ చేస్తున్నారు. ఈ ఘటన స్థానికంగా తీవ్ర విషాదాన్ని నింపింది. అయితే ఘటనకు సంబంధించిన పూర్తి వివరాలు, 21 పేజీల లేఖలోని అంశాలు, పోలీసుల దర్యాప్తు వివరాలు అధికారికంగా వెల్లడికావాల్సి ఉంది.