విద్యుత్ ఘాతానికి యువకుడి మృతి

విద్యుత్ ఘాతానికి యువకుడి మృతి పెనుగొలను సరిహద్దులో విషాద ఘటన.. 11 కేవీ తీగలు తగలడంతో ప్రమాదం

ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామ సరిహద్దులోని మెట్టగుట్ట రోడ్డులో విద్యుత్ ఘాతానికి గురై చందర్లపాడు మండలం తోటరావుపాలెం గ్రామానికి చెందిన వేల్పుల రాజేష్ (23) మృతి చెందాడు. మంగళవారం రాత్రి జరిగిన ఈ ఘటనతో తోటరావుపాలెం గ్రామంలో విషాదఛాయలు అలుముకున్నాయి.

గంపలగూడెం మండలం గోసవీడు గ్రామంలో నరికిన మామిడి కర్రను హైదరాబాద్‌కు తరలించేందుకు లారీలో లోడ్ చేశారు. అనంతరం లారీ పెనుగొలను గ్రామ సరిహద్దులోని మెట్టగుట్ట రహదారిపై వెళ్తుండగా, రోడ్డుపై ఉన్న 11 కేవీ విద్యుత్ తీగలు లారీలోని కర్రలకు తగిలాయి. దీంతో లారీ డ్రైవర్‌తో పాటు మరో ఇద్దరికి విద్యుత్ ప్రసరణ కావడంతో అప్రమత్తమైన వారు వెంటనే లారీ నుంచి కిందకు దూకారు.

లారీకి విద్యుత్ తీగలు అడ్డుగా ఉండటాన్ని గమనించిన రాజేష్ వాటిని తప్పించేందుకు ముందుకు వెళ్లాడు. లారీ ఆగిన తర్వాత తిరిగి వస్తూ విద్యుత్ తీగలో విద్యుత్ ప్రసరణ ఉన్న విషయం తెలియక దానిని పట్టుకున్నాడు. దీంతో ఒక్కసారిగా విద్యుత్ ఘాతానికి గురై అక్కడికక్కడే మృతి చెందాడు. ప్రమాదం జరిగిన తీరుతో అక్కడ ఉన్నవారు తీవ్ర భయాందోళనకు గురయ్యారు.

ఈ ఘటనపై మృతుడి సోదరుడు గణేష్ ఇచ్చిన ఫిర్యాదు మేరకు గంపలగూడెం పోలీసులు కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం తిరువూరు ప్రభుత్వ ఆసుపత్రికి తరలించారు. కూలి పనుల కోసం వెళ్లిన 23 ఏళ్ల యువకుడు అనూహ్యంగా విద్యుత్ ప్రమాదానికి బలికావడంతో తోటరావుపాలెంలో విషాదం నెలకొంది. రాజేష్ మృతితో కుటుంబ సభ్యులు కన్నీరుమున్నీరుగా విలపించగా, గ్రామస్థులు తీవ్ర దిగ్భ్రాంతికి గురయ్యారు.