అక్టోబర్ 5న తెలంగాణలో బార్ అండ్ రెస్టారెంట్ల బంద్
ఫీజుల పెంపు నిర్ణయాన్ని వెనక్కి తీసుకోవాలని బార్ అండ్ రెస్టారెంట్ అసోసియేషన్ డిమాండ్
హైదరాబాద్: బార్ల నిర్వహణ, లైసెన్స్ నిబంధనలు, ఫీజుల పెంపునకు సంబంధించి ప్రభుత్వం తీసుకున్న నిర్ణయాలకు నిరసనగా అక్టోబర్ 5న రాష్ట్రవ్యాప్తంగా బార్ అండ్ రెస్టారెంట్లను బంద్ చేయాలని తెలంగాణ బార్ అండ్ రెస్టారెంట్ అసోసియేషన్ పిలుపునిచ్చింది.
ప్రివిలేజ్ ఫీజు, బార్ స్లాబ్‌ను 8 శాతం నుంచి 20 శాతానికి పెంచడంతో పాటు లైసెన్స్ ఫీజును రూ.40 లక్షల నుంచి రూ.44 లక్షలకు పెంచాలని ప్రభుత్వం నిర్ణయించిందని అసోసియేషన్ తెలిపింది. ఈ నిర్ణయాలను వెంటనే వెనక్కి తీసుకోవాలని డిమాండ్ చేసింది.
ప్రభుత్వం తన నిర్ణయాన్ని ఉపసంహరించుకోకపోతే ఎక్సైజ్ కమిషనరేట్‌ను ముట్టడిస్తామని అసోసియేషన్ హెచ్చరించింది. ఫీజుల పెంపుతో బార్ అండ్ రెస్టారెంట్ రంగంపై అదనపు ఆర్థిక భారం పడుతుందని పేర్కొంది.
ఒక్కో బార్‌పై సుమారు 60 కుటుంబాలు ఆధారపడి జీవిస్తున్నాయని, ప్రభుత్వ తాజా నిర్ణయాల వల్ల వేలాది మంది ఉపాధి కోల్పోయే పరిస్థితి ఏర్పడే అవకాశం ఉందని అసోసియేషన్ ఆందోళన వ్యక్తం చేసింది. ప్రభుత్వం వెంటనే స్పందించి ఫీజుల పెంపు నిర్ణయాన్ని పునఃపరిశీలించాలని కోరింది.
