భారీ వర్షాలతో జలమయమైన ముంబై.. చెరువులను తలపిస్తున్న రహదారులు

దేశ ఆర్థిక రాజధాని ముంబైని భారీ వర్షాలు ముంచెత్తాయి. నగరంలో కురుస్తున్న కుండపోత వర్షాలకు లోతట్టు ప్రాంతాలు పూర్తిగా జలమయమయ్యాయి. పలుచోట్ల ఇళ్లలోకి వరద నీరు చేరడంతో ప్రజలు తీవ్ర ఇబ్బందులు ఎదుర్కొంటున్నారు.

ముంబైలోని ప్రధాన రహదారులు నీటమునిగి చెరువులను తలపిస్తున్నాయి. కొన్ని ప్రాంతాల్లో కార్లు, ఇతర వాహనాలు వరద నీటిలో చిక్కుకుని మునిగిపోయాయి. రోడ్లపై భారీగా నీరు నిల్వ ఉండటంతో నగరవ్యాప్తంగా ట్రాఫిక్ తీవ్రంగా దెబ్బతింది.

పలు ప్రాంతాల్లో వాహనాలు గంటల తరబడి నిలిచిపోగా, గమ్యస్థానాలకు చేరుకోలేక ప్రయాణికులు, వాహనదారులు తీవ్ర అవస్థలు పడుతున్నారు. భారీ వర్షాల నేపథ్యంలో ప్రజలు అత్యవసరమైతే తప్ప బయటకు రావద్దని అధికారులు సూచిస్తున్నారు.