ఎమ్మెల్యేల రెండో పెళ్లిళ్లపై సీఎం వ్యాఖ్యలు.. పేర్లు బయటపెట్టాలని ఆర్. అశోక్ డిమాండ్
బెంగళూరు: బెంగళూరు నగరంలో పెరుగుతున్న జనాభా, వేగవంతమైన పట్టణీకరణపై కర్ణాటక అసెంబ్లీలో జరిగిన చర్చ సందర్భంగా సీఎం డీకే శివకుమార్ చేసిన వ్యాఖ్యలు రాజకీయంగా చర్చనీయాంశంగా మారాయి. బెంగళూరుకు వచ్చి స్థిరపడుతున్న ఎమ్మెల్యేల్లో కొందరు రెండో వివాహం చేసుకున్నారని, అలాంటి వారు సుమారు డజను మంది ఉన్నారని, వారి వివరాల జాబితా తన వద్ద ఉందని ఆయన సభలో పేర్కొన్నారు.
బెంగళూరుకు వచ్చిన వారు తిరిగి తమ స్వస్థలాలకు వెళ్లకుండా నగరంలోనే స్థిరపడుతున్నారని, న్యాయవాదులు, ఎమ్మెల్యేలు కూడా ఇందుకు మినహాయింపు కాదని శివకుమార్ వ్యాఖ్యానించారు. ధార్వాడ, దక్షిణ కన్నడ తదితర ప్రాంతాలకు చెందిన కొందరు ఎమ్మెల్యేల గురించి తనకు తెలుసని, అయితే వారి పేర్లను సభలో వెల్లడించలేదని సంబంధిత నివేదికలు పేర్కొన్నాయి.
సీఎం వ్యాఖ్యలపై కర్ణాటక అసెంబ్లీ ప్రతిపక్ష నేత ఆర్. అశోక్ స్పందించారు. డీకే శివకుమార్ పేర్కొన్న ఎమ్మెల్యేల పేర్లను బహిరంగంగా వెల్లడించాలని ఆయన డిమాండ్ చేశారు. ఈ వ్యాఖ్యలతో బెంగళూరుకు వచ్చి స్థిరపడిన ఇతర ఎమ్మెల్యేలపై కూడా అనుమానాలు వ్యక్తమయ్యే పరిస్థితి ఏర్పడిందని అశోక్ వ్యాఖ్యానించారు.
బీజేపీకి చెందిన సీనియర్ ఎమ్మెల్యే ఎస్. సురేశ్ కుమార్ కూడా సీఎం వ్యాఖ్యలపై స్పందిస్తూ.. అసెంబ్లీ వేదికగా ఇలాంటి వ్యాఖ్యలు చేయడం వల్ల ప్రజల్లో అనవసర ఆసక్తి, చర్చకు దారితీస్తుందని అన్నారు. సీఎం పేర్కొన్న ఎమ్మెల్యేల పేరాలను వెల్లడించాలని ఆయన కూడా కోరారు.
దీంతో బెంగళూరు జనాభా పెరుగుదలపై జరిగిన చర్చలో సీఎం చేసిన వ్యాఖ్యలు ప్రస్తుతం కర్ణాటక రాజకీయ వర్గాల్లో చర్చకు దారితీశాయి.
