విజయ్ దేవరకొండ, రష్మికపై ఆన్‌లైన్‌ ప్రచారంపై సైబర్ క్రైమ్‌కు ఫిర్యాదు
హైదరాబాద్ | ఎన్ టుడే న్యూస్‌:
నటులు విజయ్ దేవరకొండ, రష్మిక మందన్నపై సామాజిక మాధ్యమాల్లో ప్రచారమవుతున్న పోస్టులపై విచారణ జరపాలని కోరుతూ వారి మేనేజర్‌ పి. నిశాంత్‌ కుమార్‌ సైబరాబాద్‌ సైబర్ క్రైమ్‌ డీసీపీకి ఫిర్యాదు చేసినట్లు సమాచారం.
‘కాఫీ విత్ కరణ్‌’ కార్యక్రమం తర్వాత ఆన్‌లైన్‌లో ప్రచారంలోకి వచ్చిన కొన్ని పోస్టులపై ఆయన అభ్యంతరం వ్యక్తం చేసినట్లు తెలుస్తోంది. విజయ్ దేవరకొండ, రష్మిక మందన్న విడిపోయారని, విడాకులు తీసుకుంటున్నారని పేర్కొంటూ జరుగుతున్న ప్రచారంపై విచారణ జరపాలని కోరినట్లు సమాచారం.
సామాజిక మాధ్యమాల్లో మార్ఫింగ్‌ చేసిన స్క్రీన్‌షాట్లు, వీడియోలు, నకిలీ ఖాతాలు, ఆన్‌లైన్‌ వేధింపులకు సంబంధించిన అంశాలపై దర్యాప్తు చేయాలని మేనేజర్‌ ఫిర్యాదులో కోరినట్లు తెలుస్తోంది. ఇందుకు సంబంధించిన పోస్టుల లింకులు, డిజిటల్‌ ఆధారాలను అధికారులకు సమర్పించినట్లు వెల్లడించారు.
సమర్పించిన ఆధారాలను పరిశీలించి, ప్రచారంలో ఉన్న పోస్టుల వెనుక ఉన్న వ్యక్తులు, ఖాతాలపై విచారణ జరిపి చట్టప్రకారం చర్యలు తీసుకోవాలని సైబర్ క్రైమ్‌ అధికారులను కోరినట్లు సమాచారం. ఈ ఫిర్యాదుపై పోలీసులు తీసుకున్న తదుపరి చర్యలకు సంబంధించిన అధికారిక వివరాలు వెల్లడికావాల్సి ఉంది.
