జాతీయ ఐక్యతా దినోత్సవ వేడుకలకు సర్పంచ్ దంపతుల ఎంపిక
- గుజరాత్‌లో అక్టోబర్ 31న జరిగే వేడుకల్లో పాల్గొనే అవకాశం
- సర్దార్ పటేల్ జయంతి సందర్భంగా వేడుకలు
సంస్థాన్ నారాయణపురం, యాదాద్రి భువనగిరి జిల్లా | ఎన్ టుడే న్యూస్‌:
గుజరాత్ రాష్ట్రంలోని నర్మదా జిల్లాలో అక్టోబర్ 31న నిర్వహించనున్న రాష్ట్రీయ ఏక్తా దివాస్‌ (జాతీయ ఐక్యతా దినోత్సవం) వేడుకల్లో పాల్గొనేందుకు సంస్థాన్ నారాయణపురం గ్రామ సర్పంచ్ ఉప్పల విజయలక్ష్మి–లింగస్వామి దంపతులు ఎంపికయ్యారు.
యాదాద్రి భువనగిరి జిల్లా నుంచి ఐదు గ్రామాలకు ఈ జాతీయ స్థాయి వేడుకల్లో పాల్గొనే అవకాశం లభించగా, వాటిలో సంస్థాన్ నారాయణపురం గ్రామానికి చోటు దక్కింది. గ్రామ సర్పంచ్ దంపతుల ఎంపికపై స్థానికులు హర్షం వ్యక్తం చేస్తున్నారు.
భారతదేశ తొలి ఉపప్రధాని, ఉక్కుమనిషి సర్దార్ వల్లభాయ్ పటేల్ జయంతిని పురస్కరించుకుని ప్రతి ఏడాది అక్టోబర్ 31న జాతీయ ఐక్యతా దినోత్సవాన్ని నిర్వహిస్తారు. ఈ సందర్భంగా గుజరాత్‌లో జరిగే వేడుకలకు ప్రధానమంత్రి నరేంద్ర మోదీ హాజరుకానున్నట్లు సమాచారం.
జాతీయ స్థాయి వేడుకల్లో పాల్గొనే అవకాశం లభించడం గ్రామానికి గర్వకారణమని స్థానికులు అభిప్రాయపడుతున్నారు.
