తుఫానును ఎదుర్కొనేందుకు రాష్ట్ర యంత్రాంగం సిద్ధం

 ప్రజలు ఆందోళన చెందవద్దు హోం మంత్రి వంగలపూడి అనిత

ప్రభుత్వం అండగా ఉంటుంది హోంమంత్రి వంగలపూడి అనిత

ఆంధ్రప్రదేశ్‌లో తుఫాను ముప్పును ఎదుర్కొనేందుకు రాష్ట్ర యంత్రాంగం పూర్తి స్థాయిలో సిద్ధంగా ఉందని హోంమంత్రి వంగలపూడి అనిత తెలిపారు. తుఫాను ప్రభావం నేపథ్యంలో ప్రజలు ఆందోళన చెందాల్సిన అవసరం లేదని, ప్రభుత్వం అన్ని విధాలుగా అండగా ఉంటుందని భరోసా ఇచ్చారు. తుఫాను కారణంగా ఎలాంటి ప్రాణనష్టం జరగకుండా చూడటమే ప్రభుత్వ ప్రధాన లక్ష్యమని స్పష్టం చేశారు. ముందస్తు జాగ్రత్త చర్యల్లో భాగంగా జాతీయ విపత్తు స్పందన దళం (ఎన్డీఆర్‌ఎఫ్‌), రాష్ట్ర విపత్తు స్పందన దళం (ఎస్‌డీఆర్‌ఎఫ్‌) బృందాలను అందుబాటులో ఉంచినట్లు వెల్లడించారు. తుఫాను ప్రభావిత ప్రాంతాల్లో పరిస్థితులను ఎదుర్కొనేందుకు, అవసరమైన సహాయక చర్యలు చేపట్టేందుకు ఈ బృందాలు సిద్ధంగా ఉన్నాయని పేర్కొన్నారు. ప్రజల భద్రతకు ప్రాధాన్యమిస్తూ ప్రభుత్వ శాఖలన్నీ సమన్వయంతో పనిచేస్తున్నాయని తెలిపారు. తుఫాను ప్రభావిత ప్రాంతాల ప్రజలు అధికారుల సూచనలు పాటించాలని, అత్యవసర పరిస్థితుల్లో అప్రమత్తంగా ఉండాలని సూచించారు. ఏదైనా అత్యవసర సహాయం అవసరమైతే టోల్‌ఫ్రీ నంబర్లు 1070, 112కు ఫోన్ చేసి సమాచారం అందించాలని హోంమంత్రి అనిత ప్రజలకు విజ్ఞప్తి చేశారు.