పెదవేగి జెడ్పీటీసీ స్థానంలో చింతమనేని సాయి నవ్యశ్రీ ఏకగ్రీవ ఎన్నిక

దెందులూరు నియోజకవర్గంలో కూటమి శ్రేణుల్లో హర్షాతిరేకాలు ఏలూరు జిల్లా, పెదవేగి: స్థానిక సంస్థల ఎన్నికల్లో దెందులూరు నియోజకవర్గంలోని పెదవేగి జెడ్పీటీసీ స్థానం కీలక పరిణామానికి వేదికైంది. దెందులూరు ఎమ్మెల్యే చింతమనేని ప్రభాకర్ కుమార్తె, కూటమి అభ్యర్థి చింతమనేని సాయి నవ్యశ్రీ ఏకగ్రీవంగా ఎన్నికైనట్లు సమాచారం వెలువడటంతో కూటమి శ్రేణుల్లో హర్షాతిరేకాలు వ్యక్తమవుతున్నాయి. నామినేషన్ల ఉపసంహరణ గడువు ముగిసిన నేపథ్యంలో ఎన్నికల అధికారులు అధికారిక ప్రకటన వెలువరించాల్సి ఉంది. ప్రత్యక్ష రాజకీయాల్లోకి అడుగుపెట్టిన తొలి ప్రయత్నంలోనే పెదవేగి జెడ్పీటీసీ స్థానంలో నవ్యశ్రీ ఏకగ్రీవంగా ఎన్నికయ్యే పరిస్థితి ఏర్పడటం రాజకీయంగా ప్రాధాన్యం సంతరించుకుంది. కన్నాపురం, రామసింగవరం, కూచింపూడి, న్యాయంపల్లి తదితర గ్రామాల్లో ఆమె నిర్వహించిన ప్రచారానికి ప్రజల నుంచి స్పందన లభించిందని కూటమి నాయకులు చెబుతున్నారు. ముఖ్యంగా మహిళలు ఆమెకు మద్దతుగా నిలిచారని పార్టీ వర్గాలు పేర్కొంటున్నాయి. నవ్యశ్రీకి పోటీగా బరిలో నిలిచిన వైఎస్సార్ కాంగ్రెస్ పార్టీ అభ్యర్థి నామినేషన్ ఉపసంహరించుకోవడంతో ఏకగ్రీవ ఎన్నికకు మార్గం సుగమమైనట్లు తెలుస్తోంది. అయితే ఏకగ్రీవ ఎన్నికకు సంబంధించిన తుది నిర్ధారణ ఎన్నికల అధికారుల అధికారిక ప్రకటనతోనే స్పష్టంకానుంది. ఈ పరిణామంతో పెదవేగి మండలంతో పాటు దెందులూరు నియోజకవర్గంలోని కూటమి నాయకులు, కార్యకర్తల్లో ఉత్సాహం నెలకొంది. ఎమ్మెల్యే చింతమనేని ప్రభాకర్ కుటుంబం నుంచి మూడో తరం రాజకీయాల్లోకి అడుగుపెట్టిన నవ్యశ్రీకి ఈ పరిణామం కీలక విజయంగా నిలవనుంది. భవిష్యత్తులో ఏలూరు జిల్లా పరిషత్ రాజకీయాల్లో ఆమె పాత్రపై చర్చ మొదలైంది. అయితే జిల్లా పరిషత్ చైర్‌పర్సన్ పదవికి సంబంధించిన తుది రాజకీయ సమీకరణాలు, ఎన్నికల ప్రక్రియ తదుపరి పరిణామాలపై ఆధారపడి ఉంటాయి.