విద్యార్థుల ఆరోగ్య పరిరక్షణకు మెడికేటెడ్ దోమతెరల పంపిణీ

పుంగనూరు, అన్నమయ్య జిల్లా:

దోమల ద్వారా వ్యాపించే మలేరియా, డెంగ్యూ, చికున్‌గున్యా, మెదడువాపు తదితర వ్యాధుల నుంచి విద్యార్థులను రక్షించడంతో పాటు, వారిలో ఆరోగ్య పరిరక్షణపై అవగాహన కల్పించేందుకు మెడికేటెడ్ దోమతెరలను పంపిణీ చేశారు.

అన్నమయ్య జిల్లా వైద్యాధికారి, మలేరియా అధికారి సూచనల మేరకు పుంగనూరు పట్టణంలోని మేలుపట్ల వద్ద ఉన్న ప్రభుత్వ గిరిజన సంక్షేమ హాస్టల్, ప్రభుత్వ సాంఘిక సంక్షేమ హాస్టళ్లలో ఈ కార్యక్రమాన్ని నిర్వహించారు. ఆయా వసతి గృహాల్లో ఉంటున్న విద్యార్థులకు వైద్య సిబ్బంది మెడికేటెడ్ దోమతెరలను అందజేశారు

ఈ సందర్భంగా వైద్య సిబ్బంది మాట్లాడుతూ.. దోమల ద్వారా వ్యాపించే వ్యాధుల పట్ల ప్రతి ఒక్కరూ అప్రమత్తంగా ఉండాలని సూచించారు. ముఖ్యంగా విద్యార్థులు వ్యక్తిగత పరిశుభ్రతతో పాటు తమ పరిసరాలను పరిశుభ్రంగా ఉంచుకోవాలని తెలిపారు. ఇంటి పరిసరాలు, వసతి గృహాల వద్ద నీరు నిల్వ ఉండకుండా జాగ్రత్తలు తీసుకోవాలని సూచించారు.

దోమకాటు ద్వారా మలేరియా, డెంగ్యూ వంటి వ్యాధులు వ్యాపించే ప్రమాదం ఉన్నందున రాత్రి వేళల్లో తప్పనిసరిగా దోమతెరలను ఉపయోగించాలని తెలిపారు. మెడికేటెడ్ దోమతెరల వినియోగం ద్వారా దోమల నుంచి రక్షణ పొందవచ్చని, వ్యాధుల నివారణకు ముందస్తు జాగ్రత్తలు ఎంతో ముఖ్యమని వివరించారు. విద్యార్థులు ఆరోగ్యకరమైన అలవాట్లను అలవర్చుకోవాలని సూచించారు.

ఈ కార్యక్రమంలో యూపీహెచ్‌సీ కొత్తపేట మెడికల్ ఆఫీసర్ డాక్టర్ రమ్యకృష్ణ, సబ్ యూనిట్ అధికారి గంగయ్య, ప్రిన్సిపాల్ అన్నపూర్ణ, హెల్త్ అసిస్టెంట్లు తేజోమూర్తి, సోమశేఖర్ ఆచారి, ఏఎన్‌ఎంలు శ్రీలత, జ్యోతి, ఆశా కార్యకర్త భాగ్యమ్మ తదితరులు పాల్గొన్నారు.